Namangan tumani IIB xodimlarining aholi osoyishtaligini taʼminlash yoʻlidagi tungi faoliyati oʻrganildi
2025-10-16 18:55:00 / Yangiliklar
Namangan viloyati IIB rahbariyati tomonidan shahar va tuman ichki ishlar boʻlimlari hamda sohaviy xizmatlarning faoliyati muntazam ravishda oʻrganilib, xodimlarning tungi xizmatni samarali tashkil etish darajasi tahlil qilinmoqda. Shu jarayonda xizmat sifatini yanada oshirish, jamoat tartibi va aholi osoyishtaligini taʼminlashga qaratilgan aniq topshiriqlar berilmoqda.
Boshqarma boshligʻi rahbarligidagi ishchi guruhning navbatdagi oʻrganish ishlari Namangan tumanida davom ettirildi. Unda “Shamsikoʻl”, “Shoʻrqoʻrgʻon”, “Koʻl boʻyi”, “Oqyer”, “Kaykovus”, “Qoʻrgʻoncha”, “Qurama”, “Eshobod”, “Qumqoʻrgʻon” va “Gʻayrat” mahallalari hududida tungi xizmatga jalb etilgan xodimlarning faoliyati koʻzdan kechirildi. Shu bilan birga, mazkur hududlarda xizmat olib borayotgan Qoʻriqlash xizmati xodimlarining jangovar shayligi amaliy tarzda sinovdan oʻtkazildi.
Oʻrganishlar davomida xizmatga jalb etilgan xodimlarga xizmat intizomiga qatʼiy amal qilish, aholining tinchligi va mahalla hududlarida xavfsiz muhitni taʼminlash boʻyicha aniq topshiriqlar berildi.
Shuningdek, tumandagi “Al-Xorazmiy” nomli xususiy taʼlim muassasasida oʻquvchilarning xavfsizligini taʼminlash chora-tadbirlari, taʼlim jarayonlari va oʻquvchilar yotoqxonasi uchun yaratilgan shart-sharoitlar bilan tanishildi. Mazkur yoʻnalishda “Oila–mahalla–taʼlim muassasasi” tamoyili asosida manzilli ishlarni tashkil etish boʻyicha masʼul rahbarlarga tegishli vazifalar yuklatildi.
Namangan viloyati IIB Axborot xizmati