Qashqadaryo viloyati IIB rahbariyati boshchiligidagi ishchi guruh tomonidan Koʻkdala tumanida oʻrganishlar olib borildi
2025-10-15 09:00:00 / Yangiliklar
Qashqadaryo viloyati IIB boshligʻi, polkovnik Abduvoxid Ismoilov rahbarligidagi ishchi guruh tomonidan Koʻkdala tumanida oʻrganishlar olib borildi.
Dastlab, tuman Agrobank Koʻkdala filiali faoliyati oʻrganildi. Bu yerda xizmat olib borayotgan qoʻriqlash boʻlimi xodimlarining tungi navbatchilik tartibi, bank binosining himoya tizimi, signalizatsiya vositalari va videokuzatuv kameralarining ishlash holati bilan tanishildi.
Bank binosini qoʻriqlashda xavfsizlik choralarini kuchaytirish, texnik vositalarning uzluksiz ishlashini taʼminlash, shuningdek, favqulodda vaziyatlarda xodimlarning harakat algoritmini takomillashtirish boʻyicha tegishli topshiriqlar berildi.
Shundan soʻng, viloyat IIB boshligʻi tumanning markaziy qismida joylashgan savdo majmualari atrofi va qoʻriqlovga olingan hududlarda boʻlib, bu yerda oʻrnatilgan videokuzatuv kameralarining ishlash holatini koʻzdan kechirdi.
Polkovnik Abduvoxid Ismoilov masʼullarga savdo hududlarida tungi qoʻriqlash xizmatini kuchaytirish, videokuzatuv tizimini kengaytirish, tadbirkorlar va mahalla faollari bilan hamkorlikni yoʻlga qoʻyish, shuningdek, fuqarolar uchun xavfsiz va osoyishta muhit yaratish boʻyicha aniq topshiriqlar berdi.
Oʻrganish jarayonida boshqarma boshligʻi tuman markazida xizmat olib borayotgan tungi xizmat xodimlari faoliyati bilan ham tanishdi.
Ushbu xizmatda faoliyat yuritayotgan xodimlar bilan ochiq muloqot oʻtkazilib, ularning xizmat samaradorligini oshirish, jamoat xavfsizligini mustahkamlash, jinoyatchilikning oldini olish hamda aholining tinchligini taʼminlash masalalari muhokama qilindi.
Qashqadaryo viloyati IIB Axborot xizmati