IIV Akademiyasida dual taʼlim samaradorligini oshirishga qaratilgan ishlar davom etmoqda
2025-10-15 09:00:00 / Yangiliklar
Taʼlimga ilgʻor yondashuvlarni keng joriy qilish har bir sohani yetuk salohiyatli kadrlar bilan taʼminlashga xizmat qiladi.
Bugungi kunda IIV Akademiyasi kursantlari dual taʼlim tizimi asosida kasbiy bilim va koʻnikmalarni egallab kelishmoqda. Ayniqsa poytaxtimiz ichki ishlar organlarida tashkil etilayotgan mashgʻulotlar nazariya va amaliyotni mos ravishda oʻzlashtirish, kelgusi faoliyatga qisqa fursatda moslashishga xizmat qilmoqda.
Oʻquv dargohi rahbari Rustam Xatamov Chilonzor tumani Ichki ishlar organlari faoliyatini muvofiqlashtirish boshqarmasida boʻlib, kursantlar ishtirokida oʻtayotgan amaliy mashgʻulotlar bilan tanishdi.
Tanishuv chogʻida dual taʼlimni samarali tashkil etish borasida amalga oshirilayotgan ishlar, mashgʻulotlarning oʻquv jarayoni bilan muvofiqligi, kursantlar uchun yaratilgan sharoitlar, ularning “xodim yordamchisi” sifatidagi kundalik faoliyati va boshqa jihatlar oʻrganildi. Yangi tizimning imkoniyatlarini kengaytirish xususida masʼullar bilan fikr almashildi.
“Dual shaklda oʻqitishni keng joriy qilishdan maqsad tizimda yoʻlga qoʻyilgan «taʼlim klasteri”ning natijadorligini oshirishdir. Shu bois, amaliy mashgʻulotlar paytida zarur koʻnikmalarni puxta oʻrgatib, kursantlarni kasbiy yoʻnaltirib borishimiz kerak. Chunki bu yoshlar ertaga tayyor xodim boʻlib amaliyotga yoʻl oladi», – dedi akademiya boshligʻi.
Shu kuni tegishli rahbarlarga xizmat intizomini mustahkamlash, murabbiy va kursantlar oʻrtasida samarali hamkorlikni taʼminlash, mashgʻulotlar uchun qoʻshimcha sharoitlar yaratish zarurligi aytildi.
«Mahallalarning kriminogen vaziyatini oʻrganish jarayonida yangidan-yangi jinoyatlar paydo boʻlayotganiga guvoh boʻlyapmiz.
Kursantlarimiz hozirdan shunga tayyor boʻlishlari, yuqori malakali mutaxassis sifatida tizim samaradorligiga hissa qoʻshishlari kerak», – dedi akademiya boshligʻi.
Muloqot davomida kursantlarga zarur tavsiyalar berildi.
IIV Akademiyasi Axborot xizmati