IIV Akademiyasi bitiruvchilarining xizmat faoliyati va kasbiy salohiyati oʻrganilmoqda
2025-10-12 10:00:00 / Yangiliklar
Shu kunlarda IIV Akademiyasini tamomlagan kadrlar faoliyati joylarga chiqqan holda oʻrganilmoqda. Maʼlumki, bu borada yangi tizim yoʻlga qoʻyilib, Qoraqalpogʻiston Respublikasi, viloyatlar hamda Toshkent shahriga alohida kafedralar masʼul etib biriktirilgan edi.
Oʻrganishlar jarayonida xodimlarning kasbiy kompetentligi, faoliyatidagi yutuq va kamchiliklari, shaxsiy fazilatlari va boshqa asosiy mezonlar monitoring qilinyapti.
Maʼnaviy-maʼrifiy va kadrlar bilan taʼminlash xizmati xodimlari bilan birgalikda soʻrovnomalar oʻtkazilib, ularning fikrlari, taklif va muammolari oʻrganilyapti.
Aytish joizki, nazariy bilim va amaliy koʻnikmalarni samarali qoʻllay olish yosh kadrlar uchun muhim jihatlardan biri sanaladi.
Bitiruvchilarni oʻrganishda ayni shu omilga alohida eʼtibor qaratilib, ularning oʻqish davridagi oʻzlashtirish koʻrsatkichlari bilan birga, amaliyotga moslashish jarayonlari ham tahlil qilinmoqda.
Monitoring yakunida xodimlar duch kelayotgan muammolarni bartaraf etishga qaratilgan taklif-tavsiyalar ishlab chiqish va ilgʻor yondashuvlarni taʼlimga tatbiq etish koʻzda tutilgan.
Bundan tashqari, hududiy ichki ishlar organlariga jalb qilingan professor-oʻqituvchilar tomonidan vazirlik tasarrufidagi akademik litseylar faoliyati ham oʻrganilyapti.
Oʻquv jarayonlari, ayniqsa oʻquvchilarni kasbiy yoʻnaltirish, ularning intellektual salohiyati va maʼnaviy-axloqiy fazilatlarini yuksaltirish, bitirgandan soʻng oliy taʼlimga qamrovini oshirish borasida amalga oshirilayotgan ishlar tahlil qilinib, oʻqituvchi-murabbiylarga metodik yordam koʻrsatilmoqda.
Yoshlar oʻrtasida turli mavzularda oʻtkazilayotgan targʻibot tadbirlari esa ularning huquqiy madaniyatini shakllantirish, tanlagan kasbiga boʻlgan sadoqatini oshirish, maʼnaviy tahdidlarga qarshi immunitetini mustahkamlashga xizmat qilmoqda.
IIV Akademiyasi Axborot xizmati