Buxoroda ichki ishlar boshqarmasining yangi binosi qurilishi izchil davom etmoqda
2025-10-12 09:00:00 / Yangiliklar
Buxoro viloyati ichki ishlar boshqarmasi boshligʻi Buxoro shahrida barpo etilayotgan Buxoro viloyati Ichki ishlar boshqarmasi yangi binosining qurilish jarayonlari bilan tanishdi.
Tadbirda Buxoro viloyati IIBning sohaviy xizmatlari rahbarlari hamda viloyat hokimining qurilish, kommunikatsiyalar, kommunal xoʻjalik, ekologiya va koʻkalamzorlashtirish masalalari boʻyicha oʻrinbosari ishtirok etib, amalga oshirilayotgan ishlar bilan batafsil tanishildi.
Qurilish maydonida olib borilayotgan ishlar, bunyod etilayotgan bino sifati, muhandislik-kommunikatsiya tarmoqlarining loyihaviy yechimlari, elektr taʼminoti, isitish va sovitish tizimlari, ichki bezak ishlari hamda atrof-muhitni obodonlashtirish jarayonlari koʻzdan kechirildi.
Yangi bino ichki ishlar tizimi faoliyatini zamonaviy talablarga mos tashkil etish, xodimlar uchun qulay mehnat sharoitlari yaratish, shuningdek, fuqarolarga xizmat koʻrsatish sifatini oshirishga qaratilgan.
Inshootda zamonaviy axborot-kommunikatsiya texnologiyalari, videokuzatuv tizimlari, elektron hujjat aylanishi uchun maxsus server xonalari va tejamkor energiya yechimlari joriy etilmoqda.
Shu bilan birga, binoda quyosh panellari oʻrnatilishi rejalashtirilgan boʻlib, bu tizim elektr energiyasidan samarali foydalanish, ekologik tozalikka erishish va xarajatlarni kamaytirishga xizmat qiladi.
Shuningdek, bino atrofida koʻkalamzorlashtirish ishlari, xodimlar dam olishi uchun moʻljallangan maskanlar, avtoturargoh va xizmat transportlari uchun qulay kirish-chiqish yoʻlaklari qurilishi ham nazarda tutilgan.
Uchrashuv davomida, viloyat IIB boshligʻi va viloyat hokimi oʻrinbosari quruvchilar bilan suhbatlashib, sifatli materiallardan foydalanish, mehnat xavfsizligini taʼminlash hamda ishlarni belgilangan muddatda yakunlash yuzasidan tegishli topshiriqlar berdilar.
Taʼkidlash joiz, yangi bino Buxoro viloyati Ichki ishlar boshqarmasining xizmat faoliyatini yangi bosqichga olib chiqish, xodimlar uchun qulay, xavfsiz va samarali mehnat muhiti yaratish, shu orqali fuqarolarga yanada sifatli xizmat koʻrsatish imkonini beradigan namunaviy inshoot boʻlishi, shubhasiz.
Buxoro viloyati IIB Axborot xizmati