O‘zbеkiston Rеspublikаsi Ichki ishlаr vаzirligi

6-oktyabr kuni Genderga oid auditorlar guruhi Ichki ishlar vazirligi Tashkiliy departamenti Yuridik taʼminlash boshqarmasida boʻlib, Oʻzbekiston Respublikasi Vazirlar Mahkamasining “Normativ-huquqiy hujjatlar va ularning loyihalarini gender-huquqiy ekspertizadan oʻtkazish tartibi toʻgʻrisidagi nizomni tasdiqlash haqida”gi qaroriga muvofiq Vazirlik sohaviy xizmatlar tomonidan ishlab chiqilgan normativ-huquqiy hujjatlarni gender-huquqiy ekspertizadan oʻtkazish boʻyicha oʻrganishlar olib bordi.

Shundan soʻng Genderga oid auditorlar guruhi Jamoat xavfsizligi departamentida boʻlib, xodimlarga yaratilgan sharoitlar, xizmat xonalari koʻzdan kechirildi, Jamoat tartibini saqlash xizmati xodimlari tomonidan tizimli amalga oshirilayotgan yangi innovatsiyalar bilan tanishdi.

Shuningdek, Yoʻl harakati xavfsizligi xizmatiga tashrif buyurdi va Yoʻl harakati xavfsizligi xizmati Tashkiliy boshqarma boshligʻi tomonidan xodimlarga yaratilgan sharoitlar, xizmat xonalari koʻrsatildi. Navbatchilik qismi, yangi xizmatga kelgan xodimning amaliyot oʻtashi uchun moʻljallangan xizmat xonasi, yoʻllarga qoʻyilgan kuzatuv kameralari turlari, yoʻl belgilari tushirilgan xonalar hamda erkak va ayol xodimlarning xizmat rejimi boʻyicha maʼlumotlar oʻrganildi.

Qolaversa, Yoʻl harakati xavfsizligi xizmati boshligʻi oʻrinbosari, polkovnik ishtirokida tizimda boʻlayotgan yangiliklar va amalga oshirilayotgan ishlar boʻyicha seminar oʻtkazildi.

Bundan tashqari, sohaviy xizmatlar faoliyatida kadrlar siyosatini olib borishda xotin-qizlar va erkaklar uchun teng huquq hamda imkoniyatlar kafolatlari toʻgʻrisidagi qonunchilik talablariga rioya etilishi, shuningdek, genderga doir kompleks yondashuv holati boʻyicha atroflicha tanishtirildi.

Shuningdek, Ichki ishlar vazirligi apparati va hududiy boʻlimlari shaxsiy tarkibi oʻrtasida savolnoma ham oʻtkazildi. Savolnomada 3000 dan ortiq xodimlar ishtirok etdilar.