Buxoro viloyati IIB rahbariyati tomonidan aralash jang sanʼati (MMA) assotsiatsiyasining viloyat boʻlimi vakillari, murabbiylar hamda faol sportchilar ishtirokida uchrashuv oʻtkazildi
2025-10-09 09:00:00 / Yangiliklar
Dastlab, yigʻilish boshida Ichki ishlar vaziri Aziz Toshpulatovning aralash jang sanʼatlari (MMA) assotsiatsiyasining yangi raisi etib tayinlanganligi alohida taʼkidlanib, yigʻilish ishtirokchilariga tanishtirildi.
Shu bilan birga, mazkur tayinlov mamlakatimizda ushbu sport turining yanada rivojlanishiga, yoshlar uchun keng imkoniyatlar eshigini ochishga, professional sportchilar safini kengaytirishga hamda sogʻlom va maʼnaviy yetuk avlodni tarbiyalash yoʻlidagi saʼy-harakatlarni yangi bosqichga olib chiqishga xizmat qilishi qayd etildi.
Videokonferensaloqa tizimi orqali oʻtgan yigʻilish davomida, MMA sport turini yanada ommalashtirish, yoshlar oʻrtasida sogʻlom turmush tarzini targʻib qilish, sport orqali jinoyatchilik va huquqbuzarliklarning oldini olish masalalari muhokama qilindi.
Shuningdek, murabbiylarning kasbiy mahoratini oshirish, sport infratuzilmasini mustahkamlash, zamonaviy sport zallari va zarur jihozlar bilan taʼminlash boʻyicha amaliy takliflar ilgari surildi.
Uchrashuvda sportchilar uchun qulay sharoit yaratish, ularning musobaqalardagi ishtirokini ragʻbatlantirish, yoshlar oʻrtasida MMA boʻyicha shahar, tuman va viloyat miqyosida muntazam turnirlar tashkil etish zarurligi taʼkidlandi.
Buxoro viloyati IIB rahbariyati ushbu yoʻnalishda amalga oshiriladigan ishlar yoshlarni sogʻlom, vatanparvar va maʼnaviy yetuk insonlar etib tarbiyalashda muhim oʻrin tutishini qayd etdi.
Buxoro viloyati IIB Axborot xizmati