Sirdaryo viloyatida profilaktika inspektorlarining xizmat faoliyatini tashkil etish boʻyicha oʻquv seminari oʻtkazildi
2025-10-08 11:50:00 / Yangiliklar
Seminarda shahar va tuman Ichki ishlar boʻlimlari boshliqlarining xizmat boʻyicha oʻrinbosarlari, shuningdek, huquqbuzarliklar profilaktikasi boʻlimi boshliqlari ishtirok etdi.
Mazkur oʻquv seminari davomida shahar-tuman IIBlarda profilaktika inspektorlari bilan xizmat oldi yoʻriqnomalarini tashkil etish tartibi muhokama qilindi. Bundan tashqari, Ichki ishlar vazirligi Jamoat xavfsizligi departamenti tomonidan ishlab chiqilgan namunaviy kunlik hisobot shakli asosida profilaktika (katta) inspektorlarining kunlik faoliyatini samarali tashkil etish boʻyicha amaliy tavsiyalar berildi.
Tadbir ishtirokchilari xizmat jarayonida yagona yondashuvni yoʻlga qoʻyish, kunlik nazorat va hisobdorlik tizimini kuchaytirish hamda inspektorlarning xizmat samaradorligini oshirish borasida zarur bilim va koʻnikmalarni egallashdi.
Shuningdek seminar davomida Oʻzbekiston Respublikasi ichki ishlar vazirining 2025-yil 20-iyuldagi 410-sonli buyrugʻi asosida ishlab chiqilgan “Mening inspektorim” axborot tizimi hamda ushbu tizimdan foydalanish tartibi haqida ham batafsil maʼlumotlar berildi.
Mazkur axborot tizimi profilaktika inspektorlarining faoliyatini sunʼiy intellekt orqali nazorat qilish va ularning ish samaradorligini reyting asosida baholash imkonini beruvchi yangi tizim ekanligi hamda ushbu tizim orqali profilaktika inspektorlari va fuqarolarga yaratilgan imkoniyatlar batafsil tushuntirildi.
Seminar yakunida qatnashchilar tomonidan muhokama qilingan masalalar yuzasidan fikr almashildi va tizimli yondashuv asosida ishlarni tashkil etish lozimligi taʼkidlandi.
Sirdaryo viloyati IIB Axborot xizmati