O‘zbеkiston Rеspublikаsi Ichki ishlаr vаzirligi

Joriy yilning oʻtgan davrida Namangan shahar IIB tomonidan amalga oshirilgan ishlar, jumladan, “Xavfsiz hudud – dolzarb 20 kunligi” doirasida oʻtkazilgan profilaktik tadbirlar tanqidiy ruhda tahlil qilindi. Viloyat IIB boshligʻi rahbarligida oʻtkazilgan yigʻilishda shahar IIB rahbariyati, sohaviy xizmatlar boshliqlari ishtirok etib, har bir yoʻnalish boʻyicha amalga oshirilgan ishlar boʻyicha hisobot berdi.

Yigʻilishda jinoyatchilikka olib kelayotgan omillarni barvaqt aniqlash, mahallalarda xavfsiz muhit yaratish, kunduzgi va tungi xizmat samaradorligini oshirish kabi masalalarga alohida eʼtibor qaratildi. Shuningdek, xodimlarning joylardagi faoliyati tahlil qilinib, ularga aniq topshiriqlar va vazifalar yuklatildi.

Jinoyatchilikni jilovlash va huquqbuzarliklarning oldini olish maqsadida Namangan viloyati IIB ishchi guruhi tomonidan shahar va tumanlarda amaliy oʻrganishlar ham olib borilmoqda. Bu galgi manzil Kosonsoy tumani boʻldi.

Oʻrganishlar davomida Yoʻl harakati xavfsizligi boshqarmasi 3-safarbarlik guruhi xodimlarining xizmat faoliyati koʻrib chiqildi. Tungi vaqtlarda haydovchilar hushyorligini oshirish va yoʻl-transport hodisalarining oldini olish boʻyicha aniq vazifalar belgilab berildi.

Tuman hokimi va prokurori ishtirokida “Tagijar” mahallasida joylashgan “Eshonbobo” masjidida xavfsizlik holati va kuz-qish mavsumiga tayyorgarlik masalalari ham oʻrganilib, tegishli xizmatlarga koʻrsatmalar berildi.

Bundan tashqari, “Namuna” mahallasi va tuman markazida tungi xizmatning tashkil etilishi, bogʻ hududlarida fuqarolar xavfsizligini taʼminlash choralari ham koʻzdan kechirildi. Xodimlarga yoʻriqnoma oʻtkazilib, aholi osoyishtaligini taʼminlash hamda profilaktik tadbirlarni kuchaytirishga qaratilgan ustuvor vazifalar yuklatildi.

Ichki ishlar organlarining bu kabi tizimli nazorat va tahlil ishlari Namangan viloyatida huquqbuzarliklar profilaktikasini yanada samarali tashkil etishga xizmat qilishi shubhasiz.

Namangan viloyati IIB Axborot xizmati