Namangan viloyati IIB ishchi guruhi tomonidan Uychi tumanida ichki ishlar organlari faoliyatining tungi oʻrganish ishlari davom ettirildi
2025-10-06 09:00:00 / Yangiliklar
Namangan viloyati IIB ishchi guruhi tomonidan viloyatning barcha shahar va tumanlarida ichki ishlar boʻlimlari hamda ijtimoiy soha obyektlarining tungi faoliyati bosqichma-bosqich oʻrganilib, aniqlangan kamchiliklarni bartaraf etish yuzasidan masʼullarga aniq vazifalar yuklatilmoqda.
Navbatdagi oʻrganish ishlari Uychi tumanida oʻtkazilib, unda jamoat xavfsizligini taʼminlash va jinoyatchilikning oldini olish maqsadida xizmatga jalb etilgan xodimlarning faoliyati oʻrganildi.
Jarayon davomida masʼul rahbarlarning axborotlari tinglanib, boshqa huquqni muhofaza qiluvchi organlar bilan hamkorlikni yanada kuchaytirish, xizmatni samarali tashkil etish hamda aniqlangan kamchiliklarni qisqa muddatda bartaraf etish boʻyicha tegishli vazifalar yuklatildi.
Shuningdek, jinoyat ishlari boʻyicha tuman sudi maʼmuriy binosida xizmat olib borayotgan xodimlarning faoliyati, u yerda koʻrilgan xavfsizlik chora-tadbirlari ham oʻrganilib, xizmat intizomi va qoʻriqlash tizimi boʻyicha zarur koʻrsatmalar berildi.
Oʻrganishlar davomida “Uychi tuman gaz” gaz taʼminoti boʻlimining kuz-qish mavsumiga tayyorgarlik jarayoni, zaxira omborlaridagi ehtiyot qismlar holati va texnik vositalarning shayligi koʻzdan kechirildi.
Mutasaddilarga mavsumni betalofat oʻtkazish, aholiga tabiiy gazni uzluksiz yetkazib berish hamda xavfsizlik talablariga qatʼiy rioya etish yuzasidan topshiriqlar berildi.
Bundan tashqari, tuman hokimi va mutasaddi tashkilotlar vakillari ishtirokida paxtani qabul qilish maskani ham oʻrganilib, mavsum davomida yongʻin xavfsizligi qoidalariga qatʼiy amal qilish, paxta tashish jarayonida yoʻl harakati xavfsizligini taʼminlash borasida tegishli vazifalar belgilab berildi hamda ijrosini taʼminlash topshirildi.
Namangan viloyati IIB Axborot xizmati