Qashqadaryo viloyati IIB boshligʻi rahbarligidagi ishchi guruh tomonidan Kasbi tumanida profilaktik yoʻnalishdagi oʻrganish ishlari olib borildi
2025-10-06 09:00:00 / Yangiliklar
Tashrif davomida viloyat IIB boshligʻi “Qatagʻon” mahalla fuqarolar yigʻinida boʻlib, mahalla yettiliklari, tungi xizmatga jalb qilingan shaxslar bilan suhbat oʻtkazdi.
Unda mahallada huquqbuzarliklarning oldini olish, jamoat tartibini taʼminlash, fuqarolarning murojaatlariga oʻz vaqtida va xolisona eʼtibor qaratish masalalari muhokama qilindi.
Shu bilan birga, mahalladagi mavjud muammolarni mahalla yetakchilari va profilaktika inspektorlari hamkorligida bosqichma-bosqich hal etish boʻyicha tegishli topshiriqlar berildi.
Shundan soʻng, polkovnik Abduvoxid Ismoilov tumandagi “Doʻstlik” mahalla fuqarolar yigʻinida boʻlib, hududda faoliyat yuritayotgan tungi xizmat xodimlari va mahalla faollari bilan suhbatlashdi.
Suhbat chogʻida hududdagi kriminogen vaziyat, jinoyatchilikka olib keluvchi sabablar va omillarni bartaraf etish, shuningdek, voyaga yetmaganlar oʻrtasida huquqbuzarliklarning oldini olish masalalariga alohida eʼtibor qaratildi.
Viloyat IIB boshligʻi hududda jamoat xavfsizligini taʼminlash, fuqarolarning osoyishtaligini saqlash hamda har bir mahallada “Xavfsiz hudud” tamoyillarini toʻliq joriy etish boʻyicha masʼullarga aniq topshiriqlar berdi.
Tashrif doirasida mahalla profilaktika inspektori tomonidan jinoyatchilikni barvaqt aniqlash va uning oldini olishga qaratilgan chora-tadbirlar boʻyicha tayyorlangan taqdimot tinglandi.
Taqdimot jarayonida amalga oshirilayotgan ishlar tahlil qilinib, mavjud kamchiliklarni bartaraf etish va profilaktika ishlarini yangi bosqichga olib chiqish zarurligi qayd etildi.
Yakunda, polkovnik Abduvoxid Ismoilov mahalla hududida huquqbuzarliklarning oldini olish, jamoat tartibini mustahkamlash, yoshlarni sogʻlom muhitda tarbiyalash va aholining huquqiy madaniyatini oshirish borasidagi ishlarni kuchaytirish yuzasidan mutasaddilarga aniq vazifalarni belgilab berdi.
Qashqadaryo viloyati IIB Axborot xizmati