Namangan viloyati IIB ishchi guruhining oʻrganishlari Mingbuloq tumanida davom ettirildi
2025-10-05 13:10:00 / Yangiliklar
Shu jarayonning navbatdagi manzili – Mingbuloq tumani boʻlib, bu yerda ham viloyat IIB boshligʻi rahbarligidagi ishchi guruh tomonidan qator yoʻnalishlar va muhim manzillar koʻzdan kechirildi.
Jumladan, Mingbuloq va Toʻraqoʻrgʻon tumanlarini bogʻlovchi koʻprikda qoʻriqlash xizmatini oʻtayotgan xodimlarning hushyorligi, masʼuliyati va xizmat intizomi tahlil qilinib, ularga aniq koʻrsatmalar berildi.
Shuningdek, tuman tibbiyot birlashmasi va uning qoshidagi hushyorlashtirish boʻlimi mutaxassislari va mazkur boʻlimga biriktirilgan xodimlarning faoliyati oʻrganildi. Ushbu maskanda yaratilgan shart-sharoitlar bilan tanishilib, boʻlimga olib kelingan fuqarolarning sogʻligʻini saqlash va tibbiy koʻrikdan oʻtkazish jarayonlarini samarali tashkil etish yuzasidan tegishli tavsiyalar berildi.
Oʻrganishlar davomida tungi xizmatga jalb etilgan xodimlar uchun yoʻriqnoma oʻtkazilib, fuqarolar osoyishtaligi, hudud tinchiligi va jamoat xavfsizligini taʼminlash yuzasidan masʼullarga aniq topshiriqlar yuklatildi.
Bundan tashqari, tumandagi paxta qabul qilish maskanida amalga oshirilgan texnika xavfsizligi chora-tadbirlari ham nazorat qilindi. Masʼul xodimlarga paxta xom-ashyosini yongʻindan asrash, tashish jarayonida harakat xavfsizligi qoidalariga qatʼiy rioya etish boʻyicha koʻrsatmalar berildi.
Shu kabi oʻrganish ishlari viloyatning boshqa shahar va tumanlarida ham bosqichma-bosqich davom ettirilmoqda.
Namangan viloyati IIB Axborot xizmati