Ichki ishlar vazirligi ishchi guruhi tomonidan poytaxt boʻylab oʻrganish ishlari davom etmoqda
2025-10-05 14:10:00 / Yangiliklar
Xususan, Bektemir tumanidagi kriminogen vaziyati ogʻir hisoblangan “Nurafshon” mahallasida jinoyatlarni barvaqt oldini olish yuzasidan tashkil etilgan ishlar boʻyicha mahalla yettiligi faoliyati oʻrganildi.
Mahallada sodir etilayotgan oldi olinishi mumkin boʻlgan jinoyatlar soni oshib ketishiga yoʻl qoʻyilgani qattiq tanqid qilindi. Hududda kriminogen vaziyatni jilovlash maqsadida jinoyatlarning sabab va omillarini tizimli va ilmiy tahlillar orqali aniqlab, kelgusida ularning barvaqt oldini olish boʻyicha koʻrsatmalar berildi.
Shuningdek, hududning turistik salohiyatini hamda fuqarolarning yashash joylari boʻyicha roʻyxatdan oʻtishlarini on-layn tizimini samaradorligini oshirish ishlarini namunasi sifatida Somonbozor koʻchasidagi oilaviy mehmon uyi faoliyati oʻrganildi.
Tadbir davomida tumanning “Nurli yoʻl” mahallasida joylashgan “Food city Tashkent” savdo majmuasida aholiga xizmat koʻrsatish sharoitlari bilan tanishildi. Mazkur maskanda xizmatni tashkil etish, fuqarolar xavfsizligini taʼminlash hamda aholi uchun yaratilgan shart-sharoitlar oʻrganildi.
Yashnobod tumanida oʻrganishlar davom etib, koʻp yillar davomida “qizil” toifada qolayotgan “Hosiyatli” mahallasidagi jinoyatchilik ahvoli boʻyicha taqdimot bilan tanishildi, mahallada oldini olish mumkin boʻlgan jinoyatlar soni oshganligi qattiq tanqid qilindi. Jinoyatlarni barvaqt oldini olish yuzasidan amalga oshirilishi lozim boʻlgan chora-tadbirlar belgilanib, mahalla faollari hamda hududga biriktirilgan masʼullarga tegishli topshiriqlar berildi.
Tadbir davomida “Asalobod” mahallasida joylashgan “Adju” universitetining yotoqxonasida talabalar uchun yaratilgan shart-sharoitlar, kuz-qish mavsumida elektr energiya bilan uzluksiz taʼminlanganligi hamda avariyaviy yoki boshqa favqulodda holatlar yuzaga kelishini oldini olish va bartaraf etish choralari samarali tashkil etilganligi oʻrganildi.
Shuningdek, hududda joylashgan “In-bazar” savdo kompleksida huquqbuzarliklarni oldini olish boʻyicha tezkor shaylik holati nazorat tariqasida tekshirildi, qoʻriqlash xizmatlarining faoliyatini samarali tashkillashtirish borasida tegishli koʻrsatmalar berildi.
Aholini energiya resurslari bilan taʼminlash borasida Toshkent issiqlik markazi MCHJ korxonasi faoliyati bilan tanishilib, kuz-qish mavsumiga tayyorgarlik holati, aholiga xizmat koʻrsatish ahvoli oʻrganildi hamda masʼullarga bu borada tegishli koʻrsatmalar berildi.
Mazkur tadbirlar mamlakatimizning barcha hududlarida davom etmoqda.