Toshkent shahrida “Profilaktika kuni” munosabati bilan bir qator tadbirlar oʻtkazildi
2025-10-03 09:00:00 / Yangiliklar
Poytaxt IIBB xodimlari tomonidan jinoyatchilikka qarshi kurash, huquqbuzarliklarni barvaqt oldini olishga qaratilgan tadbirlar muntazam ravishda oʻtkazib kelinmoqda.
Haftaning har payshanbasida muntazam ravishda oʻtkazib kelinayotgan “Profilaktika kuni” doirasida sohaviy xizmatlar, kuch-vositalarning barchasi mazkur tadbirga jalb qilinib, maktabgacha taʼlim muassasalari, umumtaʼlim maktablari, oʻrta va oliy oʻquv yurtlari, korxona va tashkilotlar, mahallalar qamrab olinadi.
Navbatdagi profilaktika kunida ham bu anʼana davom ettirilib, poytaxtning barcha tumanlarida sohaviy xizmat xodimlarning hamkorlikdagi faoliyati amalga oshirildi.
Erta tongdanoq hududiy tuzilmalarda oʻtkazilgan yoʻriqnomada tegishli topshiriq va koʻrsatmalar bilan “qurollangan” xodimlar oʻz xizmat vazifalariga kirishdilar.
Yuqorida qayd etilgan dargohlarda boʻlib oʻtayotgan uchrashuvlar, davra suhbatlari, ochiq muloqot tarzidagi targʻibot jarayonlarida dolzarb mavzularda tushunchalar berildi.
Jumladan, ayni damda nafaqat yurtimizda, balki jahonda dolzarb boʻlayotgan giyohvand, psixotrop, kuchli taʼsir qiluvchi dori vositalarining noqonuniy aylanmasi, axborot texnologiyalari sohasidagi kiberjinoyatlarga qarshi kurash, aholining kiberxavfsizlik madaniyatini oshirish, ijtimoiy tarmoqlardagi tahdid va zararli chaqiriqlar, raqamli firibgarlik va yolgʻon maʼlumotlarga qarshi himoya immunitetini shakllantirish, sogʻlom turmush tarzini ommalashtirish boʻyicha targʻibot olib borildi.
Shu bilan birga mahallalarda sodir etilgan huquqbuzarlik va jinoyatlar aholi oʻrtasida muhokama qilinib, ularning kelib chiqish sabablari, omillari tahlil qilindi, kelgusida bu kabi huquqbuzarlik va jinoyatlarga yoʻl qoʻymaslik borasida tavsiyalar berildi.
Shuningdek, profilaktika kuni munosabati bilan Toshkent shahar IIBB boshligʻi, polkovnik Ravshan Sultanxodjayev hamda boshqa huquqni muhofaza qiluvchi organlar tomonidan Shayxontohur tumanida joylashgan Noshirlik-matbaa texnikumi binosida aholi murojaatlarini oʻrganish maqsadida sayyor qabuli oʻtkazildi.
Olib borilayotgan profilaktik targʻibot ishlari jamiyatni birlashtirib, jinoyatchilik, huquqbuzarliklarga qarshi kurashish jarayonlarida qonun ustuvorligini taʼminlashda faolligini oshirishga xizmat qilishi shubhasiz.
Toshkent shahar IIBB Axborot xizmati