Ichki ishlar organlari xodimlari uchun malaka oshirish va qayta tayyorlash kurslari yakunlandi
2025-10-02 16:55:00 / Yangiliklar
Ichki ishlar vazirligi Malaka oshirish institutida “podpolkovnik” maxsus unvonini berish va ofitserlik lavozimiga tayinlash uchun oʻtkazilgan malaka oshirish hamda qayta tayyorlash kurslari yakunlandi. Kurslar institutining Olmaliq shahridagi oʻquv bazasidagi Kasbiy tayyorgarlik fakultetida tashkil etilgan boʻlib, bitiruv marosimi tantanali ruhda oʻtdi.
Oʻquv jarayonlarida nazariy va amaliy mashgʻulotlar zamonaviy axborot-kommunikatsiya texnologiyalari yordamida, interfaol usullarda – davra suhbati, seminar-trening va amaliy mashgʻulotlar shaklida tashkil etildi. Tinglovchilarning kasbiy, huquqiy, jismoniy va ruhiy tayyorgarligiga alohida eʼtibor qaratildi.
Mashgʻulotlardan tashqari tinglovchilar uchun tarixiy joylarga – “Ichki ishlar organlari tarixi muzeyi”, “Shahidlar xiyoboni”, “Gʻalaba” va “Yangi Oʻzbekiston” bogʻlariga madaniy-maʼrifiy ekskursiyalar uyushtirildi.
Bitiruv marosimida institut rahbariyati, professor-oʻqituvchilar hamda soha vakillari ishtirok etishdi. Tadbirda tinglovchilarning oʻquv davrida koʻrsatgan intizomi, masʼuliyati va faolligi yuqori baholandi. Unga yakun yasab, tinglovchilarga belgilangan namunadagi sertifikat va diplomlar tantanali tarzda topshirildi.
Bunday kurslar soha xodimlarini yuksak malakaga ega, fidoyi kadrlar sifatida tayyorlashda muhim oʻrin tutadi va ularning kelgusidagi xizmat faoliyatida samarali asos boʻlib xizmat qiladi.
IIV Malaka oshirish instituti Matbuot xizmati