Koʻrik-tanlov. Bilim, mahorat va isteʼdod namoyishi
2025-09-30 23:00:00 / Yangiliklar
Ichki ishlar vazirligi tizimida xizmat qilayotgan tibbiyot xodimlarining kasbiy bilim va koʻnikmalarini yanada mustahkamlash, ularni har tomonlama qoʻllab-quvvatlash maqsadida “Yilning eng yaxshi tibbiy hamshirasi” koʻrik-tanlovi oʻtkazilishi anʼanaga aylangan. Kuni kecha IIV Tibbiyot boshqarmasi “Oʻzbekiston” sanatoriysi va IIV Markaziy gospitali hamshiralari oʻrtasida mazkur tanlov oʻtkazildi.
Koʻrik-tanlovda bir-biridan zukko, oʻz sohasining bilimdoni boʻlgan ishtirokchilar toʻrtda shart boʻyicha oʻz mahoratlarini namoyish etishdi.
Birinchi shartda hamshiralar oʻzini tanishtirgan boʻlsa, ikkinchi shartda ularning tibbiyot sohasiga doir nazariy bilimlari hamda ijtimoiy-siyosiy savodxonligi sinovdan oʻtdi.
“Amaliy mashgʻulot” shartida esa qatnashchilarning bemor bilan muloqot madaniyati, uning ahvolini toʻgʻri baholab, muolajalarni tibbiy asbob-uskunalardan unumli foydalangan holda, sifatli bajarishi baholandi.
Soʻnggi — “Erkin mavzu” shartida ishtirokchilar mumtoz adabiyot durdonalaridan gʻazallar yod olib, qoʻshiqchilik, raqs, taniqli sanʼatkorlarning mashhur ijrolarini sahnaga olib chiqish orqali oʻzlarining ikkinchi isteʼdod qirralarini namoyish qildilar.
Yakuniy natijaga koʻra, “Oʻzbekiston” sanatoriysida uchinchi oʻrinni fizioterapiya boʻlinmasi tibbiy hamshirasi, safdor Fotima Sayfullayeva, ikkinchi oʻrinni umumiy tibbiy qism tibbiy hamshirasi, safdor Durdona Qurbonaliyeva egalladi. Faxrli birinchi oʻrinni esa kardiologiya boʻlinmasi tibbiy hamshirasi Shodiya Maxanova qoʻlga kiritdi.
IIV Markaziy gospitalida esa otorinolaringologiya boʻlinmasi tibbiy hamshirasi Maftuna Qayumova uchinchi, psixoreabilitatsiya boʻlinmasi tibbiy hamshirasi Zuhra Qosimova ikkinchi, 2-nevrologiya boʻlinmasi tibbiy hamshirasi Durdona Abduahatova birinchi oʻringa munosib koʻrildi.
Gʻolib ishtirokchilar endilikda koʻrik-tanlovning keyingi bosqichida ishtirok etadi.
©️ “Postda” gazetasi, Gulnoza Turgʻunboyeva.