Surxondaryoda ichki ishlar organlari xodimlari bilan “Uch avlod uchrashuvi” tashkil etildi
2025-09-30 09:00:00 / Yangiliklar
Mamlakatimizda IIO faoliyati samaradorligini oshirish, soha xodimlarini ijtimoiy qoʻllab-quvvatlash borasida keng koʻlamli ishlar amalga oshirilmoqda.
Bu borada, Oʻzbekiston Respublikasi Prezidentining Ichki ishlar organlari faoliyatini tubdan takomillashtirish, tizimni xalq manfaatlari yoʻlida xizmat qiladigan xalqchil va professional tuzilmaga aylantirishga qaratilgan islohotlari, dastur-ul amal boʻlib xizmat qiladi.
“Vatan uchun, millat uchun, xalq uchun” degan ezgu tamoyil ostida amalga oshirilayotgan qator islohotlar, Surxondaryo viloyati miqyosida ham oʻz aksini namoyon etmoqda.
Termiz shahridagi Yoshlar markazi binosida tashkil etilgan tantanali tadbirda, Davlatimiz rahbarining tizimda faoliyat yuritib kelayotgan, yashash xonadonlari bilan bogʻliq muammo kuzatilayotgan xodimlarni ijtimoiy qoʻllab quvvatlash maqsadidagi qarorlariga muvofiq, Surxondaryo viloyati IIO ning 25 nafar xodimlarga uy-joy sotib olish uchun dastlabki 25% lik badal puli vaucherlari viloyat IIB boshligʻi oʻrinbosari, Maʼnaviy-maʼrifiy ishlar va kadrlar bilan taʼminlash xizmati boshligʻi, podpolkovnik Zavqiddin Xujanov tomonidan tantanali ravishda topshirildi.
Qaytarib bermaslik sharti bilan, subsidiya asosida berilayotgan ushbu pul mablagʻlari, xodimlarning yashash sharoitlarini yaxshilash bilan birga ularning ijtimoiy himoyasini taʼminlashga xizmat qiladi.
Shuningdek oʻtkazilgan tadbir davomida, Oʻzbekiston Respublikasi IIV Shaxsiy xavfsizlik bosh boshqarmasi Surxondaryo viloyati boʻyicha boshqarmasi boshligʻi, podpolkovnik Sodiq Safarov tomonidan xodimlar oʻrtasida tartib intizom, xizmat intizomi va qonunchilikka qatʼiy rioya etish hamda korrupsion jinoyatlarga murosasiz kurash olib borish taʼkidlandi.
Shundan soʻng, ichki ishlar organlari faxriylari ishtirokida “Uch avlod uchrashuvi” tashkil etilib, unda faxriylar soʻzga chiqib, oʻzlarining boy bilim tajribalarini yosh avlod vakillariga ulashishdi.
Tadbir soʻngida, yaqinlashib kelayotgan 1-oktyabr- “Ustoz va murabbiylar kuni” bayrami munosabati bilan Ichki ishlar organlari tizimlarida uzoq yillar samarali xizmat qilgan, bugungi kunda qarilik gashtini surayotgan ichki ishlar faxriylariga bayram sovgʻalari ulashildi.
Surxondaryo viloyati IIB Axborot xizmati