IIV ishchi guruhi tomonidan tungi vaqtda poytaxtimizning Shayxontohur va Olmazor tumanlarida oʻrganish ishlari olib borildi
2025-09-30 09:00:00 / Yangiliklar
Ichki ishlar vazirligi ishchi guruh tomonidan Toshkent shahri tumanlarida ichki ishlar boʻlimlari shaxsiy tarkibi tomonidan jamoatchilik bilan hamkorlikda tungi vaqtlarda tashkil etilayotgan ishlar va hududlarda amalga tatbiq etilayotgan xavfsizlik choralarini tizimli ravishda oʻrganish davom etmoqda.
Tadbir davomida Shayxontohur tumanida joylashgan “Toshkent city” majmuasida aholiga xizmat koʻrsatish, koʻngil ochish hamda gastronomik turizm uchun yaratilgan sharoitlar, shuningdek Boʻston mahallasida joylashgan “Ekobozor” savdo majmuasi va unga tutash boʻlgan “Alpomish muz saroyi” sport va koʻngilochar maskanidagi sharoitlar bilan tanishildi. Mazkur sayilgoh va savdo-koʻngilochar maskanlarda xizmatni tashkil etish, fuqarolar xavfsizligini qay darajada taʼminlanganligi hamda aholining uchun yaratilgan shart-sharoitlar oʻrganildi.
Majmualarga xavfsizlikni taʼminlashga jalb qilingan xodimlarning axborotlari tinglandi, xodimlarning huquqbuzarliklarni oldini olish boʻyicha tezkor shaylik holati nazorat tariqasida tekshirildi, shuningdek huquqni muhofaza qiluvchi organlari bilan hamkorlikda xizmatni tashkillashtirish borasida tegishli koʻrsatmalar berildi.
Ishchi guruh tomonidan Olmazor tumani “Ziyo” mahallasiga xizmat koʻrsatuvchi 4-sonli Ichki ishlar boshqarmasi faoliyati oʻrganildi, ishchi guruhga masʼullar tomonidan yangi ishlab chiqilgan “Smart school” loyihasi taqdimot qilindi. Shuningdek Talabalar koʻchasida joylashgan Toshkent shahar IIBB Probatsiya boshqarmasi uchun ajratilgan bino holati va xodimlar uchun yaratilgan shart-sharoitlar bilan tanishildi.
Talabalar shaharchasi majmuasida joylashgan bino va inshootlar, talabalarning yashashlari uchun yaratilgan qulayliklar, kuz-qish mavsumida elektr energiya bilan uzluksiz taʼminlanganligi hamda avariyaviy yoki boshqa favqulodda holatlar yuzaga kelishini oldini olish va bartaraf etish choralari samarali tashkil etilganligi oʻrganildi.
Tadbirda “Beruniy” nomidagi metro stansiyasida xizmat olib boruvchi Metropolitenda xavfsizlikni taʼminlash xizmati xodimlarining faoliyati bilan tanishildi. Jarayonda, xizmatga jalb etilgan shaxsiy tarkib va biriktirilgan kuch va vositalarning shayligi, shuningdek ularning tezkor vaziyatni barqarorligini taʼminlashga tayyorgarligi tekshirilib, xizmat faoliyatini takomillashtirish yuzasidan aniq vazifalar berildi.
Shuningdek, Olmazor tumanidagi Zarqaynar va Qorasaroy koʻchalari oraligʻida joylashgan gastronomik koʻcha, u yerda faoliyat olib boruvchi ovqatlanish shoxobchalari va koʻngil ochar obyektlar, sayyohlar va mahalliy aholi uchun yaratilgan sharoitlar koʻzdan kechirildi.
Oʻrganish jarayonida, aniqlangan barcha kamchiliklar tanqidiy muhokama qilinib, kelgusida xizmat faoliyatini takomillashtirishga oid maqsadli chora-tadbirlar belgilab olindi.