Toshkent shahar IIBB boshligʻining navbatdagi shaxsiy qabuli oʻtkazildi
2025-09-29 10:50:00 / Yangiliklar
Vakolatli masʼullar tomonidan fuqarolar murojaatlarini tinglash, ularni qiynayotgan savollariga javob topish, muammolarini tinglab qonun doirasida hal qilish davlat siyosati doirasida amalga oshirilayotgani oʻz natijadorligini koʻrsatmoqda.
Buni fuqarolarimizning samimiy minnatdorliklari, mamnuniyat va ishonch bilan murojaat qilishlaridan anglash mumkin. Xususan, poytaxt Ichki ishlar bosh boshqarmasi rahbarining hududlar boʻylab oʻtkazib kelayotgan sayyor va shaxsiy qabullari bu borada poytaxt aholisi oʻrtasida yigʻilib qolgan koʻplab masalalar, muammolar, ish faoliyati jarayonida yoʻl qoʻyilgan kamchiliklar, loqayd yondashuvlar, sansalorliklarni bartaraf etish imkonini bermoqda.
Toshkent shahar IIBB boshligʻi, polkovnik Ravshan Sultanxodjayevning navbatdagi shaxsiy qabulida yuridik hamda jismoniy shaxslardan qirqqa yaqin murojaatlar qabul qilindi. Murojaatchilar keltirgan vaj-karsonlarni joyida sinchiklab oʻrganish davomida ularning oʻntasi mazkur dargohni oʻzida ijobiy hal etildi. Oʻn ikkitasi boʻyicha malakali huquqiy tushuntirish va tavsiyalar berildi.
Shuningdek, keltirilgan dalillar atroflicha oʻrganish talab qilingan murojaatlarning aksariyati boʻyicha ijro muddatlari qoʻshimcha belgilanib, qatʼiy nazoratga olindi. Tekshiruvlarning malakali, qonun doirasida hamda adolatli olib borilishi boʻyicha tegishli topshiriqlar berilib, natijalaridan murojaatchilarni yozma xabardor qilish koʻrsatib oʻtildi.
Taʼkidlamoq joizki, qabul jarayonida ichki ishlar organlari faoliyati bilan bogʻliq murojaatlar aksariyatni tashkil etdi, jumladan surishtiruv-tergov harakatlari, ichki ishlar organlariga xizmatga qabul qilish va qayta tiklash, xizmatni boshqa viloyatlar IIBga oʻtkazish kabi kadrlar bilan taʼminlash xizmatiga oid masalalar.
Har bir fuqaroning murojaatlari eʼtibor bilan tinglanib, koʻtarilgan masalalarga – gohi ijtimoiy-maishiy, tibbiy mavzularda ham boʻlishiga qaralmay uning yechimiga jiddiy yondashilayotgani, kerakli idora va tashkilotlar bilan bogʻlanib hal etilayotgani poytaxt ahlining qabullarga boʻlgan ishonchi va munosabatini ijobiy tomonga oʻzgartirayotgani shubhasiz.
Toshkent shahar IIBB Axborot xizmati