IIV Akademiyasi faoliyatida amalga oshirilgan yangilanishlar va hamkorlik istiqbollari yuqori baholandi
2025-09-26 12:40:00 / Yangiliklar
Shu kunlarda poytaxtimiz Turkiy davlatlar tashkiloti hamda Iqtisodiy hamkorlik tashkilotiga aʼzo davlatlar Bosh prokurorlarining navbatdagi yigʻilishiga mezbonlik qilmoqda.
Mazkur anjumanda ishtirok etish uchun yurtimizga kelgan MDH davlatlari Bosh prokurorlari muvofiqlashtiruvchi kengashining ijrochi kotibi Yuriy Jdanov Ichki ishlar vazirligi Akademiyasi faoliyati bilan tanishdi.
Rossiyalik mehmon mamlakatlarimiz oʻrtasidagi mushtarak aloqalarning ramzi sifatida dastlab “Doʻstlik bogʻi”da boʻldi. Unga yangi bogʻning barpo etilishi va millatlararo totuvlikni mustahkamlashdagi ahamiyati haqida soʻzlab berildi.
Shundan soʻng axborot-resurs markazi, oʻquv binolari, maxsus jihozlangan avtotransport vositalari, sport majmuasi va boshqa zamonaviy inshootlarni koʻzdan kechirdi. Taʼlim jarayonidagi ilgʻor yondashuvlar, rahbar kadrlar tayyorlashning oʻziga xos jihatlari, kursant va tinglovchilar uchun yaratilgan sharoitlar bilan tanishib, Akademiya faoliyatidagi keng qamrovli oʻzgarishlarga yuqori baho berdi.
“Ancha yillar oldin ushbu dargohga kelgan edim. Bugungi yangilanishlar Akademiyaning salohiyati tobora yuksalib borayotganidan dalolat beradi. Ayniqsa oʻqitishning zamonaviy metodlari, nazariya va amaliyot uygʻunligiga qaratilayotgan eʼtibor, yosh avlodlarni vatanparvarlik ruhida tarbiyalash borasida olib borilayotgan ishlar tahsinga sazovor”, – dedi yurtimiz mehmoni.
Shundan soʻng Akademiya boshligʻi Rustam Xatamov va Yuriy Jdanov oʻzaro muloqot qildilar. Uchrashuvda Oʻzbekiston va Rossiya munosabatlarining bugungi holati, koʻp qirrali hamkorlik doirasida erishilayotgan natijalar, manfaatli aloqalarning istiqbolli yoʻnalishlari yuzasidan fikr almashildi.
Oʻquv dargohi boshligʻi uchrashuvning ahamiyatini eʼtirof etgan holda huquqni muhofaza qilish tizimida tajriba almashinuvini kengaytirish hozirgi sharoitda dolzarb ahamiyat kasb etayotganini taʼkidladi. Oʻz navbatida, Yuriy Jdanov davlatlarimiz oʻrtasidagi munosabatlar sezilarli darajada faollashib borayotganini alohida qayd etdi.
“Tanishuv davomida Akademiya rahbari bilan samimiy suhbatlashdik. Oʻylaymanki, bugungi uchrashuv kelgusidagi hamkorligimizda muhim qadam boʻladi”, – dedi Yuriy Jdanov.
Shu kuni tomonlar manfaatli aloqalarda bir-birlarini qoʻllab-quvvatlashga kelishib oldilar.
IIV Akademiyasi Axborot xizmati