Qarshi shahri va tumanida jamoat xavfsizligini taʼminlash boʻyicha keng qamrovli oʻrganishlar oʻtkazildi
2025-09-26 12:30:00 / Yangiliklar
Mamlakatimiz boʻylab izchil ravishda amalga oshirilayotgan “Xavfsiz hudud” maxsus profilaktik tadbiri doirasida Qashqadaryo viloyati IIB boshligʻi rahbarligidagi ishchi guruh Qarshi shahri va tumanida aholi osoyishtaligini taʼminlash, huquqbuzarliklarning oldini olish va jamoat tartibini mustahkamlash boʻyicha oʻrganishlar oʻtkazdi.
Oʻrganishlar davomida “Mevazor”, “Alisher Navoiy”, “Barosh”, “Shodlik” hamda “Mustaqillik” mahallalarida tungi xizmatga jalb qilingan xodimlar, mahalla profilaktika inspektorlari, qoʻriqlash boʻlimi va viloyat IIB JXX JTSB PPX batalyoni faoliyati koʻzdan kechirildi. Jarayonda koʻp qavatli uylarning kirish-chiqish joylariga domofonlar oʻrnatilgani, mahalla va koʻchalarda kuzatuv kameralari joylashtirilgani, ayrim obyektlarni qoʻriqlash pultiga ulash ishlari yoʻlga qoʻyilgani qayd etildi. Shuningdek, savdo va xizmat koʻrsatish shoxobchalarida xavfsizlikni kuchaytirish, kuzatuv tizimini kengaytirish, aholi uchun qulay va xavfsiz muhit yaratish boʻyicha tegishli koʻrsatmalar berildi.
Tadbir doirasida huquqbuzarliklarning barvaqt oldini olish, yoshlarni sogʻlom muhitda tarbiyalash, jinoyatchilikka qarshi kurashishda mahalla faollari va yoshlarni yanada keng jalb qilish masalalari muhokama qilindi. Shu bilan birga, qoʻriqlash xodimlarining faolligi va tezkorligi tekshirildi hamda masʼullarga aniq vazifalar yuklatildi.
Qashqadaryo viloyati IIB Axborot xizmati