Fargʻona viloyatida mahallalarda xavfsiz muhit yaratish va huquqbuzarliklarning oldini olish tizimi ijrosi oʻrganildi
2025-09-26 11:15:00 / Yangiliklar
Dastlab Fargʻona shahridagi “Ilgʻor” mahallasida boʻlib, yettilik aʼzolari bilan uchrashuv boʻlib oʻtdi. Muloqot davomida mahallada jinoyatchilikni jilovlash va xavfsiz muhitni yaratish borasida amalga oshirilayotgan ishlar, erishilgan yutuqlar va yoʻl qoʻyilgan kamchiliklar tahlil qilindi.
Margʻilon shahridagi “Qashgʻar” mahallasi profilaktika inspektori faoliyati bilan tanishib, huquq-tartibotni yanada mustahkamlashda mahalla faollari, oqsoqollar va nuroniylar bilan hamkorlik qilish borasida zarur tavsiyalar berildi.
Shuningdek, shahardagi Ipakchilar bozoriga viloyatning 10 ga yaqin shahar-tumanlaridan fuqarolar savdo-sotiq uchun kelishini hisobga olib, bu yerga profilaktika inspektori lavozimini joriy etish zarur degan xulosaga kelindi. Savdo majmuasi hududida yongʻin xavfsizligi talablarini yanada kuchaytirish kerakligi taʼkidlandi.
Qoʻqon shahrida yaqinda qurib foydalanishga topshirilgan 2-Mintaqaviy muvofiqlashtirish markazining yangi binosi bilan tanishildi. Binoda yaratilgan shart-sharoitlar, xizmat xonalari, sport zal koʻzdan kechirildi. Markaz mutaxassislari bilan muloqot qilib, tezkor kriminogen vaziyat barqarorligini mustahkam ushlab turish borasida zarur koʻrsatmalar berildi.
Uchkoʻprik tumanidagi “qizil” toifaga kiritilgan “Uchkoʻprik” mahallasida amalga oshirilayotgan ishlarni joyida oʻrgangan rahbariyat yettilik aʼzolarining oʻzaro hamkorligini yanada mustahkamlash, alohida toifadagi va probatsiya nazoratidagi shaxslar bilan ishlash, mavjud muammolarni xonadonbay oʻrganish va hal etish borasida fikr-mulohazalar bildirildi.
Shuningdek, Qoʻqon shahar IIBda qoʻshma qaror asosida tashkil qilingan shtab faoliyati ham tahlil qilinib, shahardagi “Nurafshon” mahallasida yangi tashkil qilingan huquq-tartibot maskani faoliyati oʻrganildi.