IIV Akademiyasi boshligʻi Rustam Xatamov kriminogen vaziyati murakkab mahallalarda amalga oshirilayotgan ishlar yuzasidan yigʻilish oʻtkazdi
2025-09-26 08:25:00 / Yangiliklar
Videokonferensaloqa shaklida oʻtgan yigʻilishda hududlarga biriktirilgan masʼul rahbarlar, taʼlim muassasasi professor-oʻqituvchilari va magistratura tinglovchilari qatnashdi.
Maʼlumki, yurtimizdagi keng qamrovli islohotlar jarayonida mahallalarda jinoyatchilikni jilovlash masalasiga alohida eʼtibor qaratilmoqda. Bu borada davlatimiz rahbari qarorlarida aniq vazifa va mexanizmlarning belgilab berilgani tizim natijadorligini yanada oshirishga xizmat qilmoqda.
Yigʻilishda mahallalarning kriminogen vaziyati atroflicha muhokama qilindi. Huquqbuzarliklarning asl omillarini oʻrganish, “jinoyat oʻchoq”larini aniqlash va ularga barham berish, ijtimoiy profilaktika obyektlari bilan ishlash, “yoʻl xarita”lar ijrosini taʼminlash, “mahalla yettiligi” faoliyatini tashkil etish yuzasidan masʼullarning axboroti tinglandi.
Akademiya boshligʻi hududlarda eng koʻp sodir etilgan jinoyatlarga eʼtibor qaratib, har bir huquqbuzarlik sababini joylarga chiqqan holda ilmiy yondashuvlar asosida oʻrganish, muammolarning ildiziga yetib borish, amaliyotda natija beradigan takliflarni ishlab chiqish, eng muhimi, kriminogen vaziyatni barqarorlashtirish zarurligini qayd etdi.
“Mahallalarda xavfsiz muhit yaratish muhtaram Prezidentimiz rahbarligida amalga oshirilayotgan islohotlarning ustuvor maqsadi sanaladi. Kriminogen vaziyatga salbiy taʼsir koʻrsatayotgan omillarni tag-tomiri bilan yoʻqotmas ekanmiz, jinoyatchilikning oqibati bilan kurashib yuraveramiz. Buni hududlarga biriktirilgan masʼullar, ayniqsa “mahalla yettiligi” tizimi vakillari chuqur anglashi kerak”, – dedi akademiya boshligʻi.
Yigʻilishda belgilangan vazifalar ijrosini taʼminlash, huquqbuzarliklarning barvaqt oldi olishni yangicha yondashuvlar asosida tashkil qilish, “mahalla yettiligi”ning ish samaradorligini oshirish, jinoyatchilikni jilovlashni sifat jihatdan yangi bosqichga olib chiqish yuzasidan topshiriqlar berildi. Shu bilan birga, faoliyatida kamchiliklarga yoʻl qoʻygan masʼullar ogohlantirildi.
IIV Akademiyasi Axborot xizmati