Ichki ishlar vazirligi ishchi guruhi tomonidan Samarqand viloyatida oʻrganish ishlari olib borildi
2025-09-25 20:10:00 / Yangiliklar
Tadbir jarayonida ishchi guruh tomonidan Samarqand, Kattaqoʻrgʻon hamda Oqdaryo tumanlarida ichki ishlar boʻlimlarining faoliyati, shaxsiy tarkibning xizmat jarayonlari hamda mahallalarda aholi murojaatlari bilan ishlash samaradorligi oʻrganildi.
Xususan, Samarqand tumani “Yangiariq” mahallasida joylashgan Huquq-tartibot maskani faoliyati oʻrganilib, joriy yilda mahalla hududida sodir etilgan jinoyatchilik tahlili yuzasidan taqdimot bilan tanishildi. Shuningdek, mahalla hududidagi Kunlik ishchilar markazi faoliyati ham oʻrganilib, masʼullarga sohani raqamlashtirish hamda ishchilarga qoʻshimcha qulayliklar yaratish boʻyicha tegishli topshiriqlar berildi.
Tadbir jarayonida Kattaqoʻrgʻon tumani “Kadan” mahallasidagi kriminogen vaziyat, huquqbuzarlik va jinoyatlarni oldini olish hamda mahalla yettiligining faoliyati boʻyicha amalga oshirilayotgan chora-tadbirlar yuzasidan mutasaddilarning axboroti tinglandi. Mahalla faollari hamda aholi bilan muloqot oʻtkazilib, ularning taklif va murojaatlari eshitildi.
Oqdaryo tumani IIB faoliyati bilan tanishish jarayonida jinoyatchilikni jilovlash borasida amalga oshirilayotgan ishlar bilan yaqindan tanishildi. Xususan tumanda hozirgi kunda toʻrtta mahalla “qizil” toifada qolayotganligi tanqid qilindi. Jinoyatchilikni jilovlash borasida aniqlangan kamchiliklarni bartaraf etish maqsadida mahalla yettiliklarining faoliyatini yanada jadallashtirish, koʻp qavatli uylarning yoʻlaklari va koʻchalar, yoʻl infratuzilmasining holatini yaxshilash, shu bilan birga, mahallalardagi raqamlashtirish jarayonlarini samaradorligini oshirish boʻyicha tegishli koʻrsatmalar berildi.
Ichki ishlar vazirligi ishchi guruhining Samarqand viloyatidagi oʻrganishlari yuzasidan tahliliy yigʻilish boʻlib oʻtdi. Unda ichki ishlar vazirligi rahbariyati, viloyat, tuman va shahar ichki ishlar hamda sohaviy xizmatlar rahbarlari va shaxsiy tarkibi ishtirok etishdi.
Yigʻilishda ichki ishlar organlari xizmatining joriy holati, faoliyat samaradorligi, shaxsiy tarkibning kasbiy tayyorgarligi, xizmat intizomi va jamoat xavfsizligini taʼminlash borasidagi ishlar toʻliq tahlil qilindi.
Aniqlangan kamchiliklarni bartaraf etish, mahallalarda xavfsiz muhitni yaratish, jinoyatchilikning barvaqt oldini olish, shaxsiy tarkib oʻrtasida kasbiy bilim, jismoniy va jangovar shaylik hamda maʼnaviy-maʼrifiy ishlarning samaradorligini oshirish, surishtiruv va tergov jarayonlarini qonuniy tashkil etish hamda fuqarolarning murojaatlari bilan ishlash masalalarni jadallashtirish boʻyicha tegishli topshiriqlar berildi.