Toshkent shahar IIBB da “Rahbar va yoshlar” uchrashuvi boʻlib oʻtdi
2025-09-24 09:00:00 / Yangiliklar
Yoshlarga eʼtibor – ertangi kunga qoʻyilgan poydevor misoli. Davlatimiz rahbarining huzurida 2025-yil 14-fevral kuni yoshlar bilan ochiq muloqot tarzida oʻtkazilgan videoselektor yigʻilishida bir qator topshiriqlar berilgan edi.
Ularni ijrosini bajarish maqsadida, poytaxt yoshlarini qoʻllab-quvvatlash, bandligini taʼminlash, Vatanga muhabbat ruhida tarbiyalash, huquqiy savodxonligi, ongi va qonunga itoatkorlik hissini oshirish hamda ijtimoiy–maishiy muammolarini hal etishga qaratilgan qator chora-tadbirlar amalga oshirib kelinmoqda.
Toshkent shahar IIBBda tashkil etilgan “Rahbar va yoshlar” uchrashuvi ham mana shu yoʻnalishdagi muhim tadbirlardan biri boʻldi.
Unda Toshkent shahar IIBB boshligʻi polkovnik Ravshan Sultanxodjayev, Yoshlar ishlari Agentligi Toshkent shahar boshqarmasi boshligʻi Bobur Mirzayev, yoshlarga biriktirilgan tuman IIO FMB boshliqlari hamda ularning oʻrinbosarlari, yoshlar ishlari agentligi tuman rahbarlari, DXX va boshqa masʼul rahbarlar ishtirok etdi.
Taʼkidlash lozim, shu yilning aprel oyida Toshkent shahrida “Yoshlar balansi” shakllantirilib, oʻtkazilgan xatlov yakunlariga koʻra, 4 549 nafar “qizil” toifadagi yoshlar aniqlangan. Shulardan 337 nafari poytaxt IIBB tomonidan otaliqqa olinib, 84 nafar ichki ishlar organlari rahbarlari ularga masʼul etib belgilandi.
Endilikda bu yoshlarni doimiy nazorat qilib borish maqsadida Toshkent shahar IIBB tashabbusi bilan “Yoshlar bilan ishlash raqamli platformasi“ joriy etildi hamda biriktirilgan 337 nafar yoshlar ushbu elektron platformaga kiritildi.
Oʻz nutqida R.Sultanxodjayev Toshkent shahar tajribasi tariqasida joriy etilgan mazkur platforma yoshlar boʻyicha yagona raqamli maʼlumotlar bazasi boʻlib, ularning muammo va takliflari oʻz vaqtida toʻliq qabul qilinishi, yoshlar bilan ishlash jarayonlari shaffof va ochiq elektron tizim asosida yoʻlga qoʻyilganligini taʼkidladi.
Ushbu platformaga, Toshkent shahar IIBB Navbatchilik qismiga va Murojaatlar bilan ishlash boʻlimi tizimiga murojaat qilgan, Xorijga chiqish pasportini olgan, Chet elga chiqib ketgan, probatsiya hisobida turib sud tomonidan belgilangan cheklovlarni buzgan, yoʻl harakati qoidalarini buzgan, Respublika miqyosida jinoyat va maʼmuriy huquqbuzarlik sodir etgan ushbu yoshlar haqida kunlik maʼlumot kelib tushadi.
Bu maʼlumotlar mahalla profilaktika inspektoriga hamda biriktirilgan rahbarga shu zahoti xabar boʻlib yetib keladi va ular tomonidan tegishli choralar koʻriladi.
Bosh boshqarma boshligʻi oʻz nutqini yakunlar ekan, masʼul rahbarlarga bir qator topshiriqlar berdi.
Jumladan, har bir rahbar har oyda oʻziga biriktirilgan yoshlar bilan uchrashuv tashkil etish, otaliqqa olingan yoshlar tomonidan sodir etilgan holatlar aniqlanganda, ushbu yoshlar bilan uchrashib, muammolarini oʻrganish va hal etish choralarini koʻrish, yoshlar platformasiga maʼlumotlarni oʻz vaqtida kiritib borish, hududiy profilaktika inspektorlari tomonidan targʻibot-tashviqot ishlarini doimiy oʻtkazib borish kabilar.
Uchrashuv davomida soʻzga chiqqan B.Mirzayev yoshlar uchun davlatimiz tomonidan yaratib berilayotgan shart-sharoitlar va imkoniyatlar haqida batafsil maʼlumot berdi.
Ochiq muloqot davomida yoshlar oʻzlarini qiynayotgan muammolar va murojaatlari bilan Bosh boshqarma boshligʻiga yuzlandilar.
Har bir murojaat tinglanib, rahbar tomonidan asosli javoblar berildi, oʻrganib chiqish vaqt talab qiladigan murojaatlar nazoratga olinib, masʼullarga tegishli topshiriqlar yuklandi.
Uchrashuv soʻnggida namunali ishlagan yoshlar yetakchilari tashakkurnoma va esdalik sovgʻalari bilan taqdirlandi. Soʻng estrada sanʼatkorlari tomonidan kuy-qoʻshiqlar ijro etilib, yigʻilganlarga xush kayfiyat bagʻishladi.
Bu kabi ochiq muloqotlar Bosh boshqarma boshligʻi tomonidan muntazam ravishda oʻtkazib kelinishi belgilab olindi.
Toshkent shahar IIBB Axborot xizmati