Jizzax viloyati Zomin va Yangiobod tumanlarida jinoyatchilikka qarshi choralar tahlil qilindi va qoʻshimcha vazifalar belgilab olindi
2025-09-22 17:35:00 / Yangiliklar
Oʻzbekiston Respublikasi ichki ishlar vaziri oʻrinbosari, general-mayor Baxodir Mirzaraximov hamda Jizzax viloyati IIB boshligʻi, general-mayor Gʻayrat Qodirov 2025-yil 17-sentyabrdagi IIV, DXX va Milliy gvardiyaning qoʻshma rejasi ijrosini taʼminlash doirasida Zomin va Yangiobod tumanlarida boʻldilar.
Tashrif davomida tuman hududida “qizil” toifaga kiruvchi Qoʻrgʻon va Taraqqiyot mahallalarida amalga oshirilayotgan ishlar oʻrganildi. Jumladan, mahalla yettiliklari faoliyati, jinoyat va huquqbuzarliklarning oldini olish borasida koʻrilayotgan choralar atroflicha tahlil qilindi.
Uchrashuv chogʻida hududlarda jamoat tartibini saqlash, aholi xavfsizligini taʼminlash, jinoyatlarning oldini olish va huquqbuzarliklar profilaktikasini kuchaytirishga qaratilgan qoʻshimcha topshiriqlar berildi.
Mazkur chora-tadbirlar hududlarda ijtimoiy-maʼnaviy muhitni yanada sogʻlomlashtirish, yoshlar oʻrtasida huquqbuzarliklarning oldini olish hamda mahallalarda hamjihatlikni mustahkamlashga xizmat qiladi.