Fuqarolarning murojaatlarini oʻrganish, huquqiy muammolarini hal etish, xizmat faoliyatidagi kamchiliklarni bartaraf etish va ijtimoiy adolatni taʼminlash maqsadida IIV hamda uning hududiy organlari tizimida navbatdagi qabullar oʻtkazildi
2025-09-22 08:00:00 / Yangiliklar
Davlatimiz rahbarining aholi murojaatlari bilan ishlash tizimi samaradorligini oshirishga qaratilgan topshiriqlari ijrosini oʻz vaqtida, toʻliq taʼminlash maqsadida Oʻzbekiston Respublikasi Ichki ishlar vazirining navbatdagi shaxsiy qabuli tashkil etildi.
Qabul jarayonida yurtdoshlarimizdan jami 367 ta murojaat kelib tushdi. Ularning asosiy qismi tizim xodimlarining xizmat faoliyati davomida fuqarolar bilan oʻzaro munosabatlaridagi muammolar, turli masalalarda huquqiy yordam koʻrsatish, ayrim hududlarda davlat xizmatlarini tashkil etishda uchrayotgan kamchiliklar, tergov va surishtiruv bilan bogʻliq holatlar, ichki ishlar organlariga ishga va oʻqishga qabul qilish, hamda hududlar kesimida ijtimoiy-iqtisodiy muammolarni bartaraf etish kabi masalalarni oʻz ichiga oldi.
Oʻrganilgan murojaatlarning 156 tasi (42 foizi) joyida, masʼullarni jalb etgan holda muammolarni bartaraf etish orqali ijobiy hal etildi. Shu jumladan, qolgan 211 ta murojaat (58 foizi) boʻyicha kompleks oʻrganish talab etilganligi bois ijrosini nazoratga olish va yechimini taʼminlash boʻyicha soha mutasaddilariga alohida vazifalar yuklatildi.
Shuningdek, Qoraqalpogʻiston Respublikasi Ichki ishlar vazirligi, Toshkent shahri va Toshkent viloyati ichki ishlar bosh boshqarmalari hamda viloyatlar ichki ishlar boshqarmalari rahbarlari tomonidan fuqarolar bilan oʻtkazilgan shaxsiy qabullar davomida jami 389 ta murojaatlar qabul qilingan boʻlib, ulardan 133 tasi (34 foizi) tadbir jarayonida ijobiy hal etildi.
Qoʻshimcha oʻrganishni talab qilganligi bois 256 ta murojaatlar (66 foizi) ijrosi nazoratga olinib, ularni oxiriga yetkazish maqsadida soha mutasaddi rahbarlarga tegishli topshiriqlar berildi.
Shuningdek qabulga tashrif buyurgan fuqarolarni “Xavfsiz kibermakon” tezkor-profilaktik tadbiri doirasida faol boʻlishga chorlab, aholini kiberjinoyatlar qurboniga aylanib qolishdan ogohlikka chaqiruvchi eslatmalar tarqatildi.
Aholi murojaatlarini oʻrganish boʻyicha shaxsiy va sayyor qabullar belgilangan tartibda davom ettiriladi.