IIV Malaka oshirish institutida tinglovchilar uchun ijodiy uchrashuv oʻtkazildi
2025-09-21 09:00:00 / Yangiliklar
Yurtimizda amalga oshirilayotgan islohotlar jarayonida inson maʼnaviyatini yuksaltirish, jamiyatda faol fuqarolik pozitsiyasiga ega, maʼrifatli va vatanparvar avlodni tarbiyalash muhim oʻrin tutadi.
Bu borada turli ijtimoiy-siyosiy tadbirlar, maʼnaviy-maʼrifiy uchrashuv va suhbatlar muhim ahamiyat kasb etadi.
Shu maqsadda, Ichki ishlar vazirligi Malaka oshirish institutida tinglovchilar uchun Oʻzbekiston Yozuvchilar uyushmasi raisi ijodiy masalalar boʻyicha birinchi oʻrinbosari, taniqli shoir Minhojiddin Hojimatov ishtirokida “Tinchlik – neʼmat, fidoyilik – sharaf” mavzusida ijodiy uchrashuv tashkil etildi.
Tadbir davomida taniqli shoir soʻz erkinligi, tinchlikning qadri, inson va jamiyat masʼuliyati, fidoyilik va vatanparvarlik kabi mavzularda soʻz yuritib, oʻz ijodidan namuna sifatida bir qator sheʼrlar oʻqib eshittirdi.
Shuningdek, u adabiyotning inson ongi va qalbiga taʼsiri, ijodning tarbiyaviy va maʼnaviy ahamiyati haqida fikrlarini bayon etdi.
Ijodiy uchrashuv muloqot tarzida oʻtkazilib, tinglovchilarning savollariga atroflicha javoblar berildi. Ushbu uchrashuv ishtirokchilarning nafaqat bilim doirasini, balki maʼnaviy salohiyatini oshirishda ham muhim oʻrin tutdi.
Tadbir yakunida Minhojiddin Hojimatovga Institut boshligʻi polkovnik Olimjon Axmedov oʻzi, institut jamoasi va tinglovchilar nomidan minnatdorlik bildirilib, uning ijodi va faoliyatiga yuqori baho berildi.
Xulosa oʻrnida aytish mumkinki, bunday ijodiy uchrashuvlar ichki ishlar organlari xodimlarining maʼnaviy dunyoqarashini kengaytirish, yuksak maʼrifat egasi boʻlgan shaxslar bilan bevosita muloqot qilish imkoniyatini yaratadi.
Bu esa ularning xizmat faoliyatida ham oʻz ifodasini topadi.
IIV Malaka oshirish instituti