Qashqadaryo viloyati IIB boshligʻi rahbarligidagi ishchi guruh tomonidan Chiroqchi tumanida oʻrganishlar olib borildi
2025-09-21 09:00:00 / Yangiliklar
Viloyat IIB boshligʻi, polkovnik Abduvoxid Ismoilov Chiroqchi tumanidagi “Kishmishtepa” mahalla fuqarolar yigʻini hududida joylashgan 4-sonli umumtaʼlim maktabida boʻlib, tungi xizmatga jalb qilingan xodimlar bilan suhbat oʻtkazdi.
Suhbat davomida jinoyat va huquqbuzarliklarning barvaqt oldini olish, fuqarolarning osoyishtaligini taʼminlash va mahallalarda tartib-intizomni mustahkamlash boʻyicha zarur koʻrsatmalar berildi.
Shundan soʻng, tuman Xalq banki Chiroqchi filiali faoliyati oʻrganildi. Bu yerda xizmat olib borayotgan Qoʻriqlash boʻlimi xodimlarining tungi faoliyati bilan tanishilib, bank binosini himoya qilishda xavfsizlik choralarini kuchaytirish va mavjud imkoniyatlarni mustahkamlash yuzasidan masʼullarga tegishli topshiriqlar berildi.
Boshqarma boshligʻi, shuningdek, tungi xizmatga jalb qilingan IIB JXX, JTSB, PPX batalyoni hamda Yoʻl-patrul xizmati xodimlarining faoliyatini koʻzdan kechirib, xizmatni samarali tashkil etish va jinoyatchilikka qarshi kurashni kuchaytirish boʻyicha koʻrsatmalar berdi.
Oʻrganish jarayonida tuman hududidagi savdo majmualari va doʻkonlar ham koʻzdan kechirildi. Savdo shoxobchalarini qoʻriqlovga olish, kuzatuv kameralaridan samarali foydalanish va xavfsizlik choralarini kuchaytirish yuzasidan tuman Qoʻriqlash boshqarmasiga topshiriqlar berildi.
Shuningdek, tuman tibbiyot birlashmasida boʻlgan boshqarma boshligʻi birlashmadagi hushyorxonalar faoliyatini ham koʻzdan kechirib, fuqarolarning sogʻligʻi va xavfsizligini taʼminlash boʻyicha masʼullarga zarur topshiriqlar berdi.
Qashqadaryo viloyati IIB Axborot xizmati