Navoiyda “Xavfsiz kibermakon” oyligi doirasida “Rahbar va yoshlar” muloqoti oʻtkazildi
2025-09-19 20:05:00 / Yangiliklar
Joriy yilning sentyabr oyida mamlakatimiz boʻylab oʻtkazilayotgan “Xavfsiz kibermakon” oyligi doirasida Navoiy viloyati Ichki ishlar boshqarmasi tomonidan keng koʻlamli profilaktik va huquqiy-maʼrifiy ishlar olib borilmoqda.
Shu munosabat bilan, Navoiy davlat konchilik va texnologiyalar universitetida viloyat IIB boshligʻi, polkovnik Azat Tasbayev ishtirokida “Rahbar va talaba yoshlar” mavzusida ochiq muloqot tashkil etildi.
Anjumanda rahbar tomonidan yoshlar oʻrtasida uchrab turishi mumkin boʻlgan jinoyatchilik holatlari, ayniqsa, kiberhududda kuzatilayotgan huquqbuzarliklar va kiberjinoyatlarning turlari haqida toʻxtalib oʻtildi. Fuqarolar, xususan, yoshlar internet orqali sodir etilayotgan turli firibgarlik holatlaridan ogoh boʻlishi lozimligi, kiberhimoya koʻnikmalarini shakllantirish bugungi kunda juda muhim ekani alohida taʼkidlandi.
Tadbirda mutaxassislar tomonidan kiberxavfsizlik, shaxsiy maʼlumotlarni himoyalash, internetda faoliyat yuritishda yuzaga kelishi mumkin boʻlgan xatarlar va ulardan saqlanish choralari boʻyicha batafsil maʼlumotlar berildi. Yoshlarga amaliy tavsiyalar taqdim etildi va maxsus axborot-tahliliy eslatmalar tarqatildi.
Mazkur uchrashuv “Xavfsiz kibermakon” oyligi doirasida yoshlar oʻrtasida kiberxavfsizlik madaniyatini oshirish, ularni turli tahdid va xatarlardan muhofaza qilishga qaratilgan muhim tadbirlardan biri boʻldi.
Navoiy viloyati IIB Axborot xizmati