Buxoro viloyati IIB rahbariyati tomonidan Buxoro shahridagi tungi xizmat faoliyati va ijtimoiy soha obyektlari holati o‘rganildi
2025-09-18 09:00:00 / Yangiliklar
Dastlab jinoyatchilik xavfi yuqori bo‘lgan «Sadriddin Ayniy» mahallasiga tashrif buyurilib, bu yerda xavfsiz muhitni taʼminlash maqsadida, «mahalla yettiligi» va jamoatchilik vakillari bilan hamkorlikda tashkil etilgan tungi xizmat faoliyati o‘rganildi.
Xizmatga jalb qilingan xodimlar bilan suhbat o‘tkazilib, jamoat tartibini saqlash, fuqarolar xavfsizligini taʼminlash hamda jinoyat va huquqbuzarliklarning oldini olish bo‘yicha ko‘rsatmalar berildi.
Ayniqsa, mahalla hududidagi aholi gavjum joylar – istirohat bog‘lari, umumiy ovqatlanish shoxobchalari va turli ko‘ngilochar maskanlarda tartibni kuchaytirish topshirig‘i berildi.
Shundan so‘ng, Buxoro shahar IIO FMB boshqarmasi 3-son IIB faoliyati o‘rganildi.
Boshqarma boshlig‘i tomonidan kuzatuv va nazorat ishlarini kuchaytirish, ko‘pqavatli uylar atroflarida yoritish tizimlarini yaxshilash, qo‘riqlash vositalari bilan taʼminlash va profilaktika ishlarini yana-da samarali tashkil etish bo‘yicha aniq topshiriqlar berildi.
Hudud bo‘ylab piyoda xizmat olib boradigan tungi xizmat faoliyati ham qadamma-qadam yurgan holda joyida o‘rganildi.
Navbatdagi manzil – Buxoro shahridagi 21-maktab bo‘lib, unda tungi xavfsizlikni taʼminlash va kuz-qish mavsumiga tayyorgarlik ishlari o‘rganildi.
Maktabning qo‘riqlov pultiga ulanganligi tekshirilib, o‘quvchilar o‘rtasida huquqbuzarliklarning oldini olish yuzasidan ko‘rsatmalar berildi.
So‘ngra “Shodlik” mahallasini raqamlashtirish jarayoni va mulkka qarshi jinoyatlarning oldini olish bo‘yicha amalga oshirilayotgan ishlar o‘rganildi.
Mahallada o‘g‘riliklarning oldini olish maqsadida, tashkil etilgan veloturargohlar faoliyati ko‘zdan kechirilib, shunday inshootlarni boshqa mahallalarda ham barpo etish bo‘yicha masʼullarga topshiriq berildi.
Shuningdek, jamoat joylarida xavfsizlikni taʼminlash, aholi bilan bevosita muloqotni kuchaytirish va profilaktika inspektorlari faoliyatini yana-da faollashtirish bo‘yicha vazifalar belgilandi.
Nazorat jarayonida videokuzatuv vositalari hamda dron yordamida havo kuzatuvini tashkil etish masalalariga alohida eʼtibor qaratildi.
Bundan tashqari, fuqarolarning murojaat va takliflarini o‘rganish, ularning xavfsizlikka oid dolzarb muammolarini joyida hal qilishga qaratilgan chora-tadbirlar ham belgilab berildi.
Buxoro viloyati IIB Axborot xizmati