Qozogʻiston Respublikasining Turkiston viloyatida Oʻzbekiston va Qozogʻiston IIV delegatsiyalarining uchrashuvi boʻlib oʻtdi
2025-09-17 18:00:00 / Yangiliklar
Turkistonda Oʻzbekiston Respublikasi va Qozogʻiston Respublikasi Ichki ishlar vazirliklari delegatsiyalarining jinoyatlarni tergov qilishda tajriba almashish, huquqni muhofaza qiluvchi tuzilmalar oʻrtasidagi davlatlararo hamkorlikni mustahkamlash va samaradorligini oshirish masalalari boʻyicha qoʻshma kengashi oʻtkazildi.
Tadbirda Oʻzbekiston Respublikasi Ichki ishlar vaziri oʻrinbosari — Tergov departamenti boshligʻi Ramazon Ashropov, Qozogʻiston IIV vaziri oʻrinbosari Sanjar Adilov, Turkiston viloyati politsiya departamenti boshligʻi Murat Kabdenov, shuningdek, ikki mamlakatning tergov departamentlari va chegaradosh viloyatlari ichki ishlar organlari vakillari ishtirok etdilar.
Uchrashuv qatnashchilari tergov, operativ va xizmat faoliyatining asosiy yoʻnalishlari boʻyicha ishlarni takomillashtirish, xususan, transmilliy jinoyatlarni birgalikda hamkorlikda tergov qilish, bu jarayonda raqamli vositalardan keng foydalanish masalalarini muhokama qildilar. Shuningdek, oʻzaro tajriba almashish va huquqni muhofaza qilish organlar xodimlarining malakasini oshirish rejalari koʻrib chiqildi.
Delegatsiyalar vakillari politsiya departamentining operativ boshqaruv markaziga tashrif buyurdilar. U yerda ularga “Qoʻrgʻon”, “Raqamli politsiyachi”, “Elektron jinoiy ish”, “Antifrod” va boshqa tizimlar, shu jumladan sunʼiy intellektdan foydalangan holda ishlaydigan tizimlar namoyish etildi. Shuningdek, uchrashuv ishtirokchilari kiber-laboratoriya, genetik va koʻchma kriminalistik laboratoriyalarning imkoniyatlari bilan tanishdilar.