IIV Akademiyasi huzuridagi Xalqaro oʻquv-metodik kengashning navbatdagi yigʻilishi boʻlib oʻtdi
2025-09-13 12:25:00 / Yangiliklar
Videokonferensaloqa shaklida oʻtgan tadbirda Rossiya, Hindiston, Qozogʻiston, Belarus, Qirgʻiziston, Tojikiston va Ozarbayjonning turdosh oliy taʼlim muassasalari rahbarlari qatnashdi.
Yigʻilishni Akademiya boshligʻi Rustam Xatamov kirish soʻzi bilan ochib, jahonda globallashuv jarayonlari kuchayib borayotgan hozirgi sharoitda oʻquv-metodik kengash faoliyatining dolzarb ahamiyati, hamkorlikni rivojlantirish borasida istiqboldagi vazifalarga toʻxtaldi.
Yigʻilishda kun tartibidagi masalalar qizgʻin muhokama qilindi. Ishtirokchilarga oʻtgan davr mobaynida erishilgan natijalar bilan birga, joriy oʻquv yilida amalga oshiriladigan chora-tadbirlar haqida maʼlumot berildi. IIV Akademiyasi vakillaridan tashqari, Belarus IIV Akademiyasi boshligʻining birinchi oʻrinbosari A. Bashan, Tojikiston IIV Akademiyasi boshligʻi oʻrinbosari R. Rahmatjonzoda, Rossiya Federatsiyasi IIV Barnaul yuridik universiteti boshligʻi oʻrinbosari I. Botvin, Hindistonning Rashtriya Raksha universiteti professori S. Gosvami va boshqalarning chiqishlari, faoliyatni takomillashtirishga qaratilgan takliflari tinglandi.
Yigʻilish yakunida muhim qarorlar qabul qilindi. Tomonlar xalqaro tajriba almashinuvini kuchaytirish innovatsion taʼlim imkoniyatlarini kengaytirishga yoʻl ochishini taʼkidlagan holda hamkorlikni yanada mustahkamlashga kelishib oldilar.
IIV Akademiyasi Axborot xizmati