Urganch shahridagi mahallalarda kriminogen vaziyatni barqarorlashtirishga qaratilgan chora-tadbirlar tizimli ravishda amalga oshirilmoqda
2025-09-13 12:10:00 / Yangiliklar
2025-yil 11-sentyabr kuni Urganch shahrining “Mustaqillik” mahallasida “Payshanba – huquqbuzarliklar profilaktikasi kuni” munosabati bilan keng koʻlamli tashkiliy-profilaktik tadbir oʻtkazildi. Tadbirda shahar hokimi B.Rajabov, ichki ishlar boshqarmasi boshligʻi polkovnik Gʻ.Sharipov hamda IIV Akademiyasi fakultet boshligʻi polkovnik B.Adilov ishtirok etdi.
Yigʻilishda huquqbuzarliklarning oldini olish, mahallalarda xavfsiz muhit yaratish, jinoyatchilikka qarshi kurashishga qaratilgan 2025-yilda qabul qilingan Prezident qarori va Vazirlar Mahkamasi qarorlari mazmuni asosida vazifalar belgilab berildi.
Tadbirda shaharning mutasaddi tashkilotlari, huquqni muhofaza qiluvchi organlar, tibbiyot, Qoʻriqlash va Favqulodda vaziyatlar boʻlimlari, mahalla raislari va profilaktika inspektorlari ishtirok etdi. Ularning faol ishtirokida mahallada jinoyatchilikning oldini olish boʻyicha chora-tadbirlar muhokama qilindi.
Maxsus eʼtibor quyidagi yoʻnalishlarga qaratildi:
- chet eldan qaytgan va muhtoj aholi bilan suhbatlar oʻtkazish,
- giyohvandlik, qimor va boshqa salbiy odatlarga moyil shaxslar bilan individual ishlash,
- jinoyatdan qaytgan va probatsiya nazoratidagi shaxslarni jamiyatga moslashtirish,
- ajrim yoqasidagi oilalar bilan “Sogʻlom oila — sogʻlom jamiyat” tamoyili asosida ish olib borish,
- ijara shartnomasisiz yashab kelayotgan shaxslarni aniqlash va chora koʻrish,
- “xonadonbay” va “fuqarobay” mexanizmi asosida xonadonlarga tashriflar uyushtirish.
Shuningdek, targʻibot ishlarini kuchaytirish, jamoatchilik, blogerlar va OAVni faol jalb etish zarurligi taʼkidlandi.
Yigʻilish yakunida masʼullarga jinoyatchilikni oldini olish, xavfsiz muhitni taʼminlash va belgilangan vazifalarni oʻz vaqtida amalga oshirish yuzasidan topshiriqlar berildi.
Xorazm viloyati IIB Axborot xizmati