Ichki ishlar vazirligida rahbar kadrlar tarkibi uchun korrupsiyaga qarshi kurash va “Oʻzbekiston–2030” strategiyasi boʻyicha oʻquv-seminar oʻtkazildi
2025-09-13 12:05:00 / Yangiliklar
Ichki ishlar vazirligida rahbar kadrlar tarkibi uchun korrupsiyaga qarshi kurash va “Oʻzbekiston–2030” strategiyasi mavzusida oʻquv-seminar tashkil etildi. Ushbu tadbirda ichki ishlar organlari rahbarlari va malakali mutaxassislar ishtirok etdilar.
Oʻquv-seminarda korrupsiyaga qarshi kurashish boʻyicha Milliy kengashning 2025-yil 5-martda oʻtkazilgan kengaytirilgan yigʻilishida belgilangan ustuvor vazifalar muhokama qilindi. Korrupsiyaga qarshi kurashish agentligi masʼul xodimi Nodira Samandarova davlat xizmatchilari oʻrtasida odob-axloq meʼyorlarini mustahkamlash, manfaatlar toʻqnashuvining oldini olish va jamoatchilik nazoratini kuchaytirish boʻyicha amaliy chora-tadbirlarni taqdim etdi.
Kasbiy fanlar kafedrasi professori, polkovnik Zokir Umarov “Oʻzbekiston–2030” strategiyasining ichki ishlar organlaridagi ahamiyatiga toʻxtalib oʻtdi. U jamoat xavfsizligini taʼminlashda innovatsion yondashuvlar va zamonaviy axborot texnologiyalaridan samarali foydalanish masalalariga alohida eʼtibor qaratdi.
Oʻquv-seminar davomida xodimlar korrupsiyaga qarshi murosasiz kurashish, qonun ustuvorligini mustahkamlash hamda ochiqlik va hisobdorlikni taʼminlash boʻyicha oʻz fikr-mulohazalarini bildirdi.
Tadbir soʻngida ichki ishlar organlari xodimlari “Oʻzbekiston–2030” strategiyasi va korrupsiyaga qarshi kurashish boʻyicha belgilangan vazifalarni amalga oshirishda masʼuliyatni oshirishlari zarurligi taʼkidlandi.