Buxoro viloyati IIB rahbariyati tomonidan Buxoro shahridagi kriminogen vaziyati murakkab hisoblangan “Sadriddin Ayniy” mahallasida, shuningdek “Oila – mahalla – maktab” tamoyili asosida 35-umumtaʼlim maktabida tajriba tariqasida oʻrganishlar olib borildi
2025-09-12 22:00:00 / Yangiliklar
Oʻzbekiston Respublikasi Prezidentining PQ-253-sonli Qarorida belgilangan vazifalarning toʻliq va sifatli ijrosini taʼminlash, hamkor tashkilotlar bilan oʻzaro hamkorlikni samarali yoʻlga qoʻyish maqsadida bugun 11-sentyabr kuni “Sadriddin Ayniy” mahallasi hududiga biriktirilgan viloyat IIB rahbariyati hamda Buxoro shahar IIO FMB xodimlari ishtirokida yoʻriqnoma oʻtkazildi.
Yoʻriqnoma davomida bugungi kunda mazkur mahallada kriminogen vaziyatni barqarorlashtirish, jamoat xavfsizligini taʼminlash hamda fuqarolarning huquq va erkinliklarini kafolatli himoya qilish maqsadida amalga oshirilishi lozim boʻlgan ishlar muhokama qilinib, mahallaga biriktirilgan har bir xodimga “mahallabay”, “xonadonbay” va “fuqarobay” ishlash tizimi orqali jami oltita obyektlarga boʻlingan holda roʻyxatlar biriktirib chiqildi.
Boshqarma boshligʻi oʻrinbosari tomonidan, xodimlarning tungi xizmati samaradorligini oshirish jinoyat sodir etishga moyil shaxslar, muqaddam sudlanganlar va nazoratdagi shaxslarga bilan olib borilayotgan ishlarni yanada kuchaytirish hamda mahalla yettiligi faoliyati tahlil qilindi.
Xodimlar tomonidan mahallada aholi uchun yaratilgan shart-sharoitlar, huquqbuzarlik va jinoyatchiliklarning barvaqt oldini olish borasida amalga oshirilayotgan ishlar oʻrganilib birma-bir xatlovdan oʻtkazish ishlari olib borilmoqda.
Shundan soʻng, oʻrganish manzili Buxoro shahridagi 35-maktab boʻlib ushbu maktab oʻquvchi va oʻqituvchilari bilan ishchi guruh tuzilgan holda profilaktik suhbatlar oʻtkazildi.
Yakka hamda umumiy suhbatlar jarayonida maktab oʻquvchilarining ijtimoiy muammolari, oilaviy sharoitlari, qiziqishlari oʻrganildi.
Shuningdek, ularning boʻsh vaqtlarini mazmunli tashkil etish maqsadida fan va sport toʻgaraklariga jalb etish, har biri bilan alohida ishlovchi psixologlarni jalb etish choralarini koʻrish borasida masʼullarga koʻrsatmalar berildi.
Buxoro viloyati IIB Axborot xizmati