Yaqin tarix sahifalarida. Yaxshilik izlab yashadi
2025-09-11 13:00:00 / Yangiliklar
Baxtiyor Gafarov ichki ishlar organlarida qisqa davr (sakkiz yil) faoliyat koʻrsatgan boʻlsa-da, yurtimizning peshqadam va jasoratli xodimlari safidan munosib urin olishga muyassar boʻlgan edi.
U 1948-yil 18-iyun kuni Buxoroning Vobkent tumanida tavallud topdi. Aslida ota-onasi romitanlik boʻlishgan, oʻsha yillar otasi Moʻmin Gafarov Vobkent tumani IIB boshligʻi boʻlib ishlardi. Shu bois ham oilasi bilan koʻchib kelishadi. Oʻsha paytlarda ham ijtimoiy, ham siyosiy hayotda yangi islohotlar kechayotgan, nihoyatda chigal, ogʻir damlar boʻlganligi tarixdan maʼlum. B.Gafarovning bolalik damlari ham nihoyatda ogʻir kechgan. Keyinchalik otasi Romitan tumani IIB boshligʻi vazifasida ishlab, 1966-yilda mayor unvoni bilan pensiyaga chiqadi.
Baxtiyor Gafarov Toshkent politexnika institutini bitirgach, ikki yil armiya safida harbiy xizmatni oʻtab keladi. Dastlabki mehnat faoliyatini Romitan tumanidagi koʻchma mexanizatsiya kolonnasida prorab lavozimida boshlab, 1976-yil fevral oyiga qadar ishlaydi.
Ota kasbini davom ettirishga ahd qilgan B. Gafarov 1976-1978-yillarda Romitan tumani IIBda tezkor xodim boʻlib xizmat qiladi.
1980-yil avgust oyidan to 1982-yilning mayiga qadar viloyat IIB sotsialistik mulkni talon-toroj qilishga qarshi kurashish boʻlimi oʻta muhim ishlar boʻyicha boʻlinma boshligʻi, keyin viloyat IIB boʻlim boshligʻi oʻrinbosari lavozimlarida faoliyat koʻrsatadi. 1983-yil 1-aprelidan boshlab, Buxoro viloyati Sverdlovsk (hozirgi Jondor tumani) rayoni ichki ishlar boʻlimi boshligʻi oʻrinbosari vazifasiga tayinlanadi. Afsuski, bu lavozimda koʻp ishlamaydi, atigi bir oyu ikki kun xizmat qiladi, xolos...
Oʻtgan asrning sakson uchinchi yillari mamlakatimiz boʻylab keng yoyilgan “oʻzbek ishi” qatagʻoni koʻpgina malakali ichki ishlar organlari rahbarlari qatori kapitan Baxtiyor Gafarovni ham oʻz domiga tortdi. U pora berishga vositachilik qilgan, degan nohaq ayb bilan egallab turgan lavozimidan ozod etiladi.
- Rahmatli Baxtiyor akamni qamoqqa olib ketishgach, uyga bir gala rus millatiga mansub kishilar kelib, uyni tintuv qilishdi. Pul va tillalar chiqmagach, ular hayron qolishdi. Ammo sir boy bermay hammasi keyin aniq boʻladi, deb ketishdi, — deydi B.Gafarovning turmush oʻrtogʻi Gulnora opa oʻsha kunlarni xotirlab. — Haqiqatan ham tergov jarayonida rahbarga pora berishga vositachilik qilgan degan tuhmatni qoʻyishdi. 1984-yil may oyida Oliy sud nohaq ayb bilan sakkiz yil qamoq jazosi tayinladi.
Haqiqatan ham B.Gafarov 1987-yil 4-dekabrgacha Qozogʻiston Respublikasi lagerida jabr-sitamlarni tortdi, lekin irodasini bukolmadilar. Koʻz koʻrib, quloq eshitmagan jabrlardan qatʼiy iroda va kelajakka ishonchi tufayli omon qoldi. Qamoqxonaning oʻzida sud boʻlib, oqlandi, deb hukm chiqarildi. B.Gafarov Buxoroga, oilasi bagʻriga qaytdi.
Baxtiyor Gafarovning ikki oʻgʻil va ikki qizi boʻlib, ular ota-bobosi izidan bormadi. Oʻgʻillarining biri tadbirkor, ikkinchisi oshpaz. Qizlari ham oʻzlaridan tinchigan. Ammo ukasi Shuhrat ichki ishlar organlarida uzoq yillar faoliyat koʻrsatib, viloyat IIB Jinoyat qidiruv boshqarmasi boshligʻi oʻrinbosari lavozimidan podpolkovnik unvoni bilan pensiyaga chiqadi. U oʻsha davrni eslab quyidagilarni hikoya qildi:
- Akam qamalganda Vobkent tumani IIB boshligʻining birinchi oʻrinbosari lavozimida ishlardim. Meni oddiy tergovchilikka oʻtkazishdi. Shunga ham shukr qildim. Butunlay ishdan olib tashlashsa, hech narsa qilolmasdim. Baxtiyor akam qamoqdan kelgach, infarkt tashxisi bilan shifoxonada davolanib chiqdi. Sogʻligini tiklagach, uni ichki ishlar organlariga ishlashga chaqirishdi. Ammo akam taklifni rad etdi. Qurilish mahsulotlari savdo-sotigʻi bilan shugʻullanuvchi kooperativda doʻstlari bilan bir muddat ishlab, keyin Romitan tumanidagi sugʻurta idorasida boshliq vazifasida mehnat qildilar.
Har bir amalning asorati qoladi deganlaridek, Baxtiyor Gafarovga ham oʻsha Gdlyan va Ivanovlarning tazyiqi va tergov usullari tufayli chekkan azobu uqubatlari oʻz taʼsirini koʻrsata boshladi. U tez-tez kasalga chalinib, oxiri 2011-yili 63 yoshida yorugʻ dunyoni tark etdi. Ammo doʻstlari va yaqinlari qalbida yaxshi xotira qoldirdi.
Mirzoqul Ahadov, oʻz muxbirimiz. “Postda”
Buxoro viloyati