O‘zbеkiston Rеspublikаsi Ichki ishlаr vаzirligi

Yosh kadrlarning ish jarayonlariga tezda kirishib ketishi, koʻnikmalarni shakllantirish, mustaqil toʻgʻri qaror qabul qilishi oʻquv jarayonlarida amaliyotni qanday va kimning murabbiyligi ostida oʻtaganiga koʻp jihatdan bogʻliq. Soʻnggi paytlarda dual taʼlimga yaʼni, nazariy bilimlarni amaliyot bilan mustahkamlab borishga muhim eʼtibor qaratilmoqda. Bu Prezidentimiz tomonidan qabul qilinayotgan qarorlarda ham oʻz aksini topmoqda. Xususan, Yurtboshimiz tomonidan “Ichki ishlar organlari uchun professional kadrlarni tayyorlashning yangi tizimini joriy etish boʻyicha chora-tadbirlar toʻgʻrisida”gi Qarori bunga yaqqol dalildir. Mazkur qaror asosida Oʻzbekiston Respublikasi Ichki ishlar vazirligi Akademiyasi hamda Toshkent shahar IIBB tomonidan Ichki ishlar organlariga yetuk mutaxassislar yetishtiruvchi oʻquv dargohi – IIV Akademiyasi bakalavriati kunduzgi taʼlim shaklida oʻquv jarayonini dual taʼlim asosida tashkillashtirish boʻyicha Qoʻshma qaror qabul qilindi. Qarorga koʻra bilim yurtining 2025-2026 oʻquv yillari 2 va 3-kurs kursantlarining joriy yilning 9-sentyabridan poytaxt IIBB hududiy tuzilmalarida 7 ta yoʻnalish – tezkor-qidiruv, ekspert-kriminalistika, huquqbuzarliklar profilaktikasi, xizmat faoliyatini tarbiyaviy-psixologik taʼminlash, tashkiliy-shtab, probatsiya, raqamlashtirish texnologiyalari sohasidagi jinoyatlarga qarshi kurashish faoliyatlari boʻyicha haftaning ikki kunida dual taʼlimning amaliyot qismini oʻtashlari belgilandi.

Toshkent shahar IIBBda boʻlib oʻtgan uchrashuvda Akademiya boshligʻi polkovnik Rustam Xatamov, IIBB boshligʻi polkovnik Ravshan Sultanxodjayev, kursantlar va ularga biriktirilgan murabbiylar hamda boshqa masʼullar ishtirok etishdi. Unda joriy etilgan dual taʼlim haqida batafsil maʼlumotlar olinib, amaliyotga start berildi.

Kursantlarga har bir yoʻnalish boʻyicha malakali hamda katta amaliy tajribaga ega xodimlar murabbiy sifatida biriktirilib, ular kursantlarga normativ-huquqiy hujjatlarni oʻzlashtirish, nazariy bilimlarini amaliyotga tatbiq etishini nazorat qilish qatorida ichki ishlar organlari xodimlarining kasbiy madaniyat va xizmat intizomi kodeksi, oʻrnatilgan tartib-qoidalarga amal qilishlarini ham baholab boradilar. Taʼkidlamoq joizki, sohaviy xizmatlar va hududiy boʻlinmalarga biriktirilgan kursantlar ish haqqi belgilanmagan va shtat birliklariga kiritilmagan holda taʼlim yoʻnalishlari boʻyicha “xodim yordamchisi” lavozimiga tayinlanadilar. Bu tayinlov boʻlgʻusi xodimlarning masʼuliyatini yanada oshirishga, bilimlarini amalda erkin qoʻllashga, toʻgʻri qonuniy qaror qabul qilishga turtki boʻladi. Yana bir eʼtirof etadigan jihati, bilim yurtini bitirgan har bir kursant mustaqil va yetuk xodim sifatida ichki ishlar organlari safiga qoʻshiladi.

Toshkent shahar IIBB Axborot xizmati