O‘zbеkiston Rеspublikаsi Ichki ishlаr vаzirligi

Yangi Namangan tumani “Mehnatobod” mahallasida jinoyatchilikning barvaqt oldini olish va aholi osoyishtaligini taʼminlash maqsadida izchil chora-tadbirlar amalga oshirilmoqda. 2021-yil oktyabr oyidan buyon mazkur hududda profilaktika inspektori lavozimida faoliyat yuritayotgan Javlonbek Abdurahmonov bu borada sidqidildan xizmat olib bormoqda.

8744 nafar aholi istiqomat qiladigan bu maskan “sariq” toifada. Oxirgi 8 oy davomida mahallada 2 ta bezorilik jinoyati qayd etilgan. Statistikaning oʻzgarishi profilaktika inspektorini yanada shijoat bilan ishlashga undadi. Kelgusida “yashil” toifaga oʻtishga astoydil harakatlar boshlab yuborildiki, mahallaning kirish-chiqish yoʻllariga avtomashina raqamini aniqlovchi hamda yuzdan tanib oluvchi kuzatuv kameralari oʻrnatildi.

Shuningdek, aholi gavjum joylardagi savdo markazlari, xonadonlar qoʻriqlov pultiga ulandi.

Hududda 19 nafar muqaddam sudlangan shaxs yashaydi. Mahalladagi hokim yordamchisi H. Mamadaliyev hamkorligida ishga joylashtirish choralari koʻrilib, ularning bandligi taʼminlandi.

Shu orqali jinoyatchilikka moyil shaxslarni ijtimoiy hayotga qaytarishga erishilgan. Masalan, Yangi bogʻ koʻchasida istiqomat qiluvchi muqaddam sudlangan J.B. ga bandligini taʼminlash maqsadida chorvachilik yoʻnalishi boʻyicha qoramol olishi uchun 30 mln soʻm mablagʻ ajratildi.

Jazoni ijro etib qaytgan odamlarni ijtimoiy hayotga moslashtirish, ular qalbida ertangi kunga ishonch uygʻotish muhim, deb oʻylayman. Bu toifadagilar bilan profilaktik ishlarni tashkil etish doimiy nazoratimizda boʻlishi kerak, — deydi Javlonbek Abdurahmonov.

Mahallada oilaviy ajralishlarning oldini olishga ham eʼtibor qaratilmoqda.

Yil boshidan buyon profilaktika inspektori saʼy-harakati bilan 8 ta nizoli oila yarashtirilgan. Ushbu oilalarga mahalla faxriylari masʼul qilib biriktirildiki, bu oilalarda tinch-totuvlikni mustahkamlashga xizmat qilmoqda.

Mahallaning tajribali gulchisi Dilshodbek Abdurahmonov 15-yildan buyon gul parvarishlash bilan shugʻullanib, sohaning haqiqiy ustasiga aylangan. Hozirda uning 7 ta plantatsiyasida 60 mingdan ziyod gullar parvarishlanmoqda, shularning 50 mingtasi sotuvga tayyor.

Gulxonalarda bahor va yozda 5-6 nafar ishchi ishlasa, kuz va qishda bu raqam 20-25 taga yetadi. Ishchilar oyiga 2-3 million soʻm maosh olib, barqaror daromadga ega.

Bundan tashqari, aksariyat xonadonlarda manzarali sunʼiy gul yasash yoʻlga qoʻyilgan. Masalan, Ibrohimjon Joʻrayev oilasi shu hunar ortidan kuniga 10 mln soʻmgacha daromad topadi.

Aytmoqchi boʻlganimiz, mahallada ishsizlikni bartaraf etishga harakat qilayotgan tajribali gulchilar “Mehnatobod”ni jinoyatchilikdan holi hududga aylantirishga munosib hissa qoʻshishmoqda.

Javlonbekning zimmasida esa hali masʼuliyatli vazifalar koʻp, ularni bajarishda fidoyi xodimga omad va zafarlar tilab qolamiz.

©️ “Postda” gazetasi, Gulchehra Buvamirzayeva, Namangan viloyati.