IIV Akademiyasida mustaqilligimizning oʻttiz toʻrt yilligi munosabati bilan “Vatan uchun, millat uchun, xalq uchun!” shiori ostida bayram tadbiri boʻlib oʻtdi
2025-09-03 11:00:00 / Yangiliklar
Soha faxriylari, professor-oʻqituvchilar, xodimlar ishtirok etgan tadbirda istiqlol yillari erishilgan yutuq va marralar, yangi Oʻzbekistonda kechayotgan shiddatli islohotlar eʼtirof etildi.
Tadbir avvalida oʻquv dargohi boshligʻi Rustam Xatamov soʻz olib, yillar oʻtgani sayin eng ulugʻ, eng aziz neʼmat boʻlmish mustaqillikning qadr-qimmati va ahamiyati ortib borayotganini alohida taʼkidladi.
Istiqlol tufayli milliy oʻzligimiz, tariximiz, qadriyatlarimiz tiklangani, xalqimiz oʻz taqdiri va taraqqiyot yoʻlini mustaqil belgilash, erkin va farovon hayot barpo etish huquqini qoʻlga kiritgani, Oʻzbekiston dunyo hamjamiyatidan munosib oʻrin olgani aytib oʻtildi.
– Ayniqsa, keyingi yillarda milliy taraqqiyotimizning yangi davriga qadam qoʻydik. Islohotlarimiz ruhi va mazmuniga “Inson qadri uchun, inson baxti uchun” degan ezgu gʻoya chuqur singdirildi. Xalq davlat organlariga emas, balki davlat organlari xalqqa xizmat qilishi kerakligi asosiy mezonga aylandi. Yangi Oʻzbekistonni barpo etish shunchaki balandparvoz maqsad emas, aksincha umummilliy harakatga aylandi, – dedi akademiya boshligʻi.
Bayram tadbirida muhtaram Prezidentimiz Shavkat Mirziyoyev rahbarligida hayotimizning barcha jabhalarida erishayotgan yutuqlarga aniq raqamlar misolida toʻxtaldi.
Bu natijalar mustaqillik sharofati, davlatimiz rahbari tomonidan amalga oshirilayotgan xalqparvar siyosat, inson manfaatlari yoʻlidagi islohotlarning amaliy natijasi ekanligi eʼtirof qilindi.
Akademiya boshligʻi taʼlim maskani tashkil topgan sanaga ham toʻxtalib, soʻnggi yillar oʻquv dargohi uchun tom maʼnoda yuksalish davri boʻlganini, istiqboldagi ulkan reja va marralar taʼlim sifatini yanada oshirishga xizmat qilishini taʼkidladi.
Shu kuni bir guruh xodimlar Ichki ishlar vazirligining idoraviy mukofotlari bilan tantanali ravishda taqdirlandi. Vatan, tinchlik, istiqlol shukuhini tarannum etgan kuy-qoʻshiqlar barchaga bayramona kayfiyat ulashdi.
IIV Akademiyasi Axborot xizmati