Oʻzbekiston Respublikasi Ichki ishlar vaziri, general-leytenant Aziz Tashpulatovning mustaqilligimizning 34 yilligi munosabati bilan bayram tabrigi
2025-08-31 08:00:00 / Yangiliklar
Joriy yilda Mustaqilligimizning 34 yillik bayrami “Vatan uchun, millat uchun, xalq uchun!” degan bosh gʻoya asosida nishonlanmoqda.
Qayd etish lozimki, mustaqillik yillarida, ayniqsa, soʻnggi toʻqqiz yil ichida muhtaram Prezidentimiz Shavkat Miromonovich Mirziyoyevning bevosita rahbarligida ichki ishlar organlari tubdan isloh qilinib, xalqchil tuzilmaga aylandi. Jinoyatchilikka qarshi kurashish va bevosita mahallalarda xavfsizlikni taʼminlash borasida jamoatchilik va boshqa huquq-tartibot idoralari bilan yaqindan hamkorlik oʻrnatildi.
Davlatimiz rahbarining mamlakatimizda xavfsizlikni taʼminlash masalasiga boʻlgan eʼtibori va tinimsiz saʼy-harakatlari – bugungi murakkab sharoitda mamlakatimizda tinchlik-osoyishtalik muhitini saqlab turish uchun zamin yaratmoqda, albatta.
Oʻzbekistonning xalqaro maydondagi nufuzi yildan-yilga ortib, jozibadorligi oshmoqda, chet el davlatlari, ayniqsa, qoʻshni mamlakatlar bilan aloqalarimiz tobora yaxshilanmoqda.
Tizimning har bir xodimi zimmasidagi masʼuliyatni chuqur anglab yetgan holda, el-yurt osoyishtaligini saqlash va jamoat xavfsizligini taʼminlash yoʻlida fidoyilik va sadoqat bilan xizmat qilmoqda.
Fursatdan foydalanib, barchangizga sihat-salomatlik, uzoq umr, baxt-saodat, masʼuliyatli va sharafli xizmat faoliyatingizda muvaffaqiyatlar tilayman!
Aziz Tashpulatov,
Oʻzbekiston Respublikasi Ichki ishlar vaziri,
general-leytenant.