Sirdaryo viloyatida mahallalarda jinoyatchilikning oldini olish va xavfsiz muhitni taʼminlash ishlari kuchaytirilmoqda
2025-08-28 11:00:00 / Yangiliklar
Joriy yilning 18-avgust kuni “Oʻzbekiston Respublikasi Prezidentining ayrim qarorlariga mahallalarda jinoyatchilikning barvaqt oldini olish tizimi natijadorligini yanada oshirishga qaratilgan oʻzgartirish va qoʻshimchalar kiritish toʻgʻrisida”gi Prezident qarori qabul qilindi.
Mazkur qaror mamlakatimizda tinchlik va osoyishtalikni taʼminlash, fuqarolar xavfsizligi hamda ularning huquq va erkinliklarini ishonchli himoya qilishga qaratilgan ishlarining mantiqiy davomi hisoblanadi.
Jinoyatchilikka qarshi kurashishda mahalla darajasidagi chora-tadbirlar alohida ahamiyatga ega. Chunki huquqbuzarliklarni aynan birinchi boʻgʻinning oʻzida bartaraf etish samaradorlikka erishishning eng toʻgʻri yoʻli hisoblanadi. Qarorga muvofiq, oxirgi besh yil davomida kriminogen vaziyati murakkab boʻlgan “qizil” toifaga kiritilgan mahallalarda joriy yil yakuniga qadar alohida tashkiliy-profilaktik tadbirlar oʻtkazilib, xavfsiz muhitni yaratish belgilangan.
Shu maqsadda Sirdaryo viloyati prokurori hamda viloyat ichki ishlar boshqarmasi boshligʻi Guliston shahar Taraqqiyot mahallasida boʻlib, bu yerdagi masʼullar faoliyati bilan yaqindan tanishdilar.
Jarayonlarda mahalladagi kriminogen vaziyatga salbiy taʼsir koʻrsatayotgan omillarni aniqlash va ular bilan manzilli ishlarni yoʻlga qoʻyish zarurligi taʼkidlandi.
Shuningdek, mahallada ijtimoiy profilaktika ishlarini kuchaytirish, ayniqsa oila-turmush doirasida huquqbuzarlikka moyil, janjalkash va nizoli oilalar holidan majburiy ravishda har uch kunda xabar olish amaliyoti yoʻlga qoʻyilishi belgilandi.
Yoshlar bandligini taʼminlash va jinoyatchilikning oldini olish maqsadida esa “mahalla yettiligi” tashabbusi bilan aholi oʻrtasida targʻibot-tashviqot ishlarini olib boruvchi “mahalla targʻibotchisi” jamoatchilik guruhlarini tashkil etish zarurligi qayd etildi.
Bundan tashqari, mahallada raqamlashtirish jarayonlarini toʻliq amalga oshirish, kuzatuv kameralarining uzluksiz ishlashini taʼminlash, jismoniy va yuridik shaxslarning mol-mulkini texnik qoʻriqqa olish qamrovini yil yakuniga qadar yanada kengaytirish boʻyicha ham topshiriqlar berildi.
Mazkur ishlar “mahalla yettiligi” bilan doimiy hamkorlikda amalga oshirilishi belgilandi.
Sirdaryo viloyati IIB Axborot xizmati