O‘zbеkiston Rеspublikаsi Ichki ishlаr vаzirligi

Ichki ishlar vazirligi Malaka oshirish institutida ichki ishlar organlarining barcha darajadagi boʻlim boshliqlari, tuman (shahar-tarmoq) boshligʻining oʻrinbosarlari lavozimiga tayinlash uchun oʻquv kursi, hamda navbatdagi “podpolkovnik” va “mayor” maxsus unvonini berish uchun navbatdagi maxsus malaka oshirish, ofitserlik lavozimiga tayinlash uchun qayta tayyorlash, Qorovul qoʻshinlari xodimlarining kasbiy tayyorgarlik oʻquv kurslari yakunlanishi munosabati bilan bitiruv tadbirlari boʻlib oʻtdi.

Oʻquv kursida nazariy va amaliy mashgʻulotlar professor-oʻqituvchilar va sohaviy xizmatlarning tajribali amaliyot xodimlari tomonidan zamonaviy axborot kommunikatsiya texnologiyalarini qoʻllagan holda interfaol usullarda davra suhbati, bahs-munozara, seminar-trening, amaliy mashgʻulot shaklida olib borildi.

Mashgʻulotlarda tinglovchilarning kasbiy, huquqiy, ijtimoiy-siyosiy, jangovar-jismoniy, ruhiy, tibbiy tayyorgarligini taʼminlashga alohida eʼtibor qaratildi. Fuqarolar bilan muloqotlarda yuzaga keladigan nostandart vaziyatlar, muammoli holatlar yuzasidan Institut professor-oʻqituvchilari tomonidan tayyorlangan videolavhalar orqali mavzularga doir huquqiy yechim va tavsiyalar koʻrsatildi.

Shuningdek, dam olish kunlari “Ichki ishlar organlari tarixi muzeyi”, “Shahidlar xiyoboni”, “Gʻalaba” va “Yangi Oʻzbekiston” bogʻlariga ekskursiyalar tashkil etildi.

Tadbirda soʻzga chiqqanlar sohani bilimli, zamonaviy fikrlaydigan, yuksak insoniy va yetuk salohiyatga ega kadrlar bilan toʻldirish boʻyicha bir qator chora-tadbirlar amalga oshirilayotganligi eʼtirof etdilar.

IIV Malaka oshirish instituti Matbuot xizmati