Namangan viloyat hokimligida mahallalarda xavfsiz muhitni yaratish borasida joriy yilning 7 oyi davomida amalga oshirilgan chora-tadbirlar muhokama qilindi
2025-08-24 15:00:00 / Yangiliklar
Namangan viloyati hokimligida videoselektor tarzida yigʻilish oʻtkazilib, unda jinoyatchilikni jilovlash, kriminogen vaziyat barqarorligini taʼminlash va mahallalarda xavfsiz muhitni yaratish borasida joriy yilning 7 oyi davomida amalga oshirilgan chora-tadbirlar muhokama qilindi.
Yigʻilishda Namangan viloyati IIB boshligʻi hududlarda ichki ishlar organlari tomonidan amalga oshirilgan ishlar yuzasidan yigʻilish ishtirokchilariga maʼlumot berdi.
Shuningdek, yigʻilishda 2025-yil 18-avgust kuni qabul qilingan PQ-253-son Qarorining mazmun-mohiyati atroflicha koʻrib chiqildi. Ushbu hujjat asosida mahallalarda xavfsiz muhit yaratish boʻyicha tashkiliy-profilaktik tadbirlarning samaradorligini oshirish, ijtimoiy profilaktika tadbirlarini amalga oshiruvchi subyektlarning shaxsiy javobgarligini kuchaytirish, shuningdek, kriminogen vaziyati murakkab mahallalarda alohida yondashuv asosida manzilli ishlarni tashkil etish kabi ustuvor vazifalar belgilab olindi.
Namangan viloyati IIB Axborot xizmati