IIV Akademiyasida magistratura tinglovchilarining bitiruv marosimiga bagʻishlangan tadbir boʻlib oʻtdi
2025-08-23 12:10:00 / Yangiliklar
IIV Akademiyasida magistratura tinglovchilarining bitiruv marosimiga bagʻishlangan tadbirda amaliyotga yoʻl olayotgan rahbar kadrlar oldida turgan ustuvor vazifalar alohida qayd etildi.
Tadbir avvalida bitiruvchilarga tantanali ravishda diplomlar topshirildi. Ichki ishlar vaziri oʻrinbosari, general-mayor Davron Nazarmuhammedov soʻz olib, muhtaram Prezidentimiz rahbarligida ichki ishlar organlari tizimida amalga oshirilayotgan keng qamrovli islohotlarga toʻxtaldi.
Aytib oʻtilganidek, keyingi yillarda tizim faoliyati oʻzgarib, mutlaqo yangicha mazmun kasb etib bormoqda. Sohadagi rahbarlar, qaysi boʻgʻinda ishlamasin, avvalo, zamonaviy bilim, boshqaruv salohiyati va dunyoqarashga ega boʻlishi, kun-u tun xalq manfaatini oʻylab, aholining dard-u tashvishi bilan yashashi kerak. Ichki ishlar organlarini xalqchil tuzilmaga aylantirish ana shu mezonlarga bogʻliq.
“Bugun xalqimizning oʻzi faoliyatimizga baho bermoqda. Prezidentimiz har bir rahbar kundalik ishini mahalladan boshlashi, aholi bilan doimiy muloqotda boʻlib, ularni qiynayotgan muammolarni hal qilishi zarurligini taʼkidlab keladilar. Bitiruvchilarimiz davrning ana shu oʻtkir talabini doimo his qilishi lozim”, – dedi vazir oʻrinbosari.
Tadbirda magistratura taʼlim jarayoniga tatbiq qilib borilayotgan innovatsion yondashuvlar, oʻquv yili mobaynida modullar asosida tashkil qilingan mashgʻulotlar, ilgʻor xorijiy tajribalarni oʻrganish, tinglovchilarning boshqaruv mahoratini oshirishga qaratilgan oʻquv kurslari, shu bilan birga, taʼlim sifatini oshirish maqsadida belgilab olingan istiqboldagi vazifalar qayd etib oʻtildi.
“Ichki ishlar organlari uchun rahbar kadrlar tayyorlash masalasiga davlat siyosati darajasida eʼtibor qaratilmoqda. Magistraturani tamomlayotgan istiqbolli kadrlarga ulkan ishonch bildirilmoqda. Shu bois, bilim va koʻnikmalaringizni amaliyotda samarali qoʻllab, yangi avlod rahbar kadrlari degan nomga munosib boʻlishingiz shart”, – dedi akademiya boshligʻi Rustam Xatamov.
Shuningdek, tadbirda soʻz olganlar ichki ishlar organlaridagi izchil islohotlar xalqimizning tinch-osoyishta hayotini taʼminlash, hududlarda jinoyatchilikni jilovlash, huquqbuzarliklarning barvaqt oldini olishda muhim omil boʻlayotganini taʼkidlab oʻtishdi.
Bitiruvchilar nomidan soʻzga chiqqanlar tizimning faoliyat samaradorligini oshirish yoʻlida yanada masʼuliyat, shijoat va fidoyilik bilan xizmat qilishga vaʼda berdilar.
IIV Akademiyasi Axborot xizmati