Buxoro viloyatida jinoyatchilikning oldini olish va ijtimoiy moslashuvni taʼminlash boʻyicha manzilli ishlar amalga oshirilmoqda
2025-08-23 11:25:00 / Yangiliklar
Prezident qaroriga muvofiq, mahallalarda jinoyatchilikning oldini olish tizimi samaradorligini oshirish maqsadida Buxoro viloyati IIB va prokuratura rahbarlari, shuningdek Buxoro shahar IIO FMB vakillari “Shayxul Olam”, “Nizomiy Ganjaviy”, “Ahmad Donish” va “Sadriddin Ayniy” mahallalariga biriktirildi. Bu hududlarda “Xavfsiz hovli — xavfsiz xonadon” tamoyili asosida fuqarolar muammolarini oʻrganish va hal etishga qaratilgan manzilli ishlar olib borilmoqda.
Viloyat hokimi Botir Zaripov, IIB boshligʻi hamda prokuror ishtirokida oʻtkazilgan yigʻilishlarda mavjud muammolar tahlil qilinib, jinoyatchilikka qarshi kurashish, huquqbuzarliklarning oldini olish va mahalla faollari hamda tashkilotlar bilan hamkorlikni kuchaytirish yuzasidan mutasaddilarga aniq topshiriqlar berildi.
Shu bilan birga, viloyat IIB boshligʻi va prokurori Probatsiya nazoratida boʻlgan fuqarolar bilan uchrashib, ularning ijtimoiy moslashuvi, ish bilan taʼminlanishi, yashash sharoitlari va oilaviy muammolarini oʻrgandi. Uchrashuvda fuqarolarning qayta jinoyatga yoʻl qoʻymasligi uchun zarur shart-sharoitlarni yaratish, ishga joylashish, kasb-hunar oʻrganish va ijtimoiy qoʻllab-quvvatlash masalalari muhokama qilindi.
Tadbir yakunida har bir fuqaro bilan individual yondashuv asosida ishlash, profilaktik choralarni kuchaytirish va nazorat tadbirlarini bosqichma-bosqich boshqa hududlarda ham davom ettirish belgilab olindi.
Buxoro viloyati IIB Axborot xizmati