IIV JXD YHXX rahbariyati tomonidan Navoiy viloyati avtomobil yoʻllarida amalga oshirilayotgan ishlar oʻrganildi
2025-08-22 17:50:00 / Yangiliklar
2025-yil 22-avgust kuni IIV JXD Yoʻl harakati xavfsizligi xizmati rahbariyati Navoiy viloyatiga tashrif buyurib, viloyat hududida yoʻl harakati xavfsizligini taʼminlash borasida amalga oshirilayotgan ishlar bilan tanishdi.
Tashrif doirasida Navoiy shahridagi Alisher Navoiy va Amir Temur hamda Alisher Navoiy va Meʼmorlar koʻchalari kesishmasidagi chorrahalarda sodir boʻlayotgan yoʻl-transport hodisalarini oldini olish maqsadida chorrahalarning geometrik parametrlarini takomillashtirish ishlari oʻrganildi.
Shuningdek, Navbahor tumani hududidan oʻtuvchi A-379 avtomobil yoʻlining 5–8 va 11–14-kilometrlari hamda D-067 yoʻlining 159–177 va 180–184-kilometrlari oraligʻida piyodalar trotuarlari va velosiped yoʻlaklarini barpo etish, shuningdek, sunʼiy yoritish tizimlarini oʻrnatish ishlari koʻzdan kechirildi.
Shu bilan birga, Qiziltepa tumani hududidan oʻtuvchi 4-R63 avtomobil yoʻlining 68-kilometrida piyodalarning belgilanmagan joydan kesib oʻtish holatlarini oldini olish maqsadida oʻrnatilayotgan temir panjaralar, Xatirchi tumanidagi 85-B027 avtomobil yoʻlining 2-kilometrida rekonstruksiya qilinayotgan koʻprikda olib borilayotgan ishlar ham oʻrganildi. Mutaxassislarga zarur tavsiya va koʻrsatmalar berildi.
Shuningdek, mahalliy aholi bilan ochiq muloqot tashkil etildi. Fuqarolarning taklif va istaklari tinglanib, yoʻl harakati xavfsizligini yanada mustahkamlashga qaratilgan qoʻshimcha chora-tadbirlarni amalga oshirish boʻyicha tegishli topshiriqlar berildi.