Toshkent shahar Ichki ishlar organlari xodimlari oʻrtasida “Zakovat“ intellektual bellashuvi oʻtkazildi
2025-08-21 11:45:00 / Yangiliklar
Oʻzbekiston Respublikasi IIV tizimlarida xizmat olib borayotgan xodimlarning maʼnaviy-maʼrifiy ongini yuksaltirish, kasbiy, jismoniy tayyorgarligini muntazam ravishda oshirib borishga alohida eʼtibor qaratilgan.
Maʼnan barkamol, intellektual salohiyatli insonlar vatani, xalqiga sidqidildan xizmat qilishga ongli ravishda yondashadilar. Ichki ishlar organlari, xususan Toshkent shahar Ichki ishlar bosh boshqarmasida xodimlarning maʼnaviy-maʼrifiy dunyoqarashini boyitish, intellektual salohiyatini oshirishga katta eʼtibor beriladi. Bosh boshqarma uning tarkibiy tuzilmalari, hududiy boʻlinmalari xodimlari oʻrtasida turli aqliy-tafakkur oʻyinlari va musobaqalarning oʻtkazib turilishi bunga yaqqol dalil.
Poytaxtning Olmazor tumanida joylashgan “Zakovat arenasi”da shunday bellashuvlarning navbatdagisi boʻlib oʻtdi. Unda Bosh boshqarma apparati, tarkibiy tuzilmalari va hududiy boʻlinmalari shaxsiy tarkibidan tuzilgan: har bir jamoa olti nafardan xodimni jamlagan, jami 102 nafar xodimdan iborat 17 ta jamoa aqliy kuch sinash maydonida oʻz bilim va tafakkurlarini namoyish etdilar. Oʻrtaga tashlangan savollarga ajratilgan vaqtda toʻgʻri va aniq javob bergan jamoalar gʻalaba sari imkoniyatlarini oshirib borishdi.
Natijada bahs yakuniga koʻra 1-oʻrinni Bosh boshqarma apparati jamoasi; 2-oʻrinni Patrul-post xizmati brigadasi; 3-oʻrinni Olmazor tumani IIO FMB bilimdonlari egalladi. Gʻolib va sovrindor jamoalarga tegishli diplom va qimmatbaho sovgʻalar topshirildi.
Bunday aql va tafakkur bellashuvlari shaxsiy tarkib oʻrtasida bilimga ragʻbat uygʻotib, hamkorlik va oʻzaro hurmat rishtalarini yanada mustahkamlashga xizmat qilishiga aminmiz.
Toshkent shahar IIBB Axborot xizmati