Qaror va ijro. Har lahzada muhim
2025-08-21 07:40:00 / Yangiliklar
Prezidentimizning 2024-yil 18-dekabrdagi «Ichki ishlar organlarining yoʻl harakati qoidalarini buzish bilan bogʻliq maʼmuriy huquqbuzarlik toʻgʻrisidagi ishlarni koʻrib chiqish sohasidagi faoliyatini takomillashtirish toʻgʻrisida»gi qaroriga asosan, Qashqadaryo viloyati IIB JXX YHXB tasarrufida Maʼmuriy amaliyot markazi faoliyati yoʻlga qoʻyildi.
Markazga kirgan fuqarolar «reseption» xizmatidan kerakli maʼlumotni olib, bu yerdagi beshta guruhdan biriga murojaat qilishi mumkin. Har bir guruhning oʻz vazifasi boʻlib, ular fuqarolar murojaatlarini qabul qilib, ijrosini taʼminlash, murojaatchilarga huquqiy tushuntirish berish bilan birga, profilaktik ishlarni ham amalga oshirmoqda. Shu bilan birga, markazda uzluksiz ravishda «Call markaz» tezkor aloqa tarmogʻi faoliyat koʻrsatmoqda.
Har bir haydovchi va piyoda hushyorlik bilan yoʻllarda harakatlansa, noxush hodisalar sodir etilishiga imkon qolmaydi. Biroq Qashqadaryo viloyatida joriy yilning oʻtgan davrida roʻy bergan 653417 ta qoidabuzarlik yuzasidan tegishli qarorlar chiqarilgan. Afsuski, ular orasida qoʻpol qoidabuzarliklar soni 509724 tani tashkil etdi. Shundan 755 ta holatda haydovchilar spirtli ichimlik isteʼmol qilgan holda rulga oʻtirgan. Jumladan, joriy yilning 4-may kuni Kitob tumanida «Cobalt» rusumli avtomashina haydovchisi A.F. spirtli ichimlik isteʼmol qilib avtomashina boshqarib yurgani YPX inspektorlari tomonidan aniqlangan va unga nisbatan tegishli qonuniy chora koʻrilgan.
Sodiq RAHIMOV, oʻz muxbirimiz.
Qashqadaryo viloyati.