Toshkent shahar IIBB Yoʻl patrul xizmati hamda Patrul-post xizmati xodimlariga yangi xizmat avtomobillari topshirildi
2025-08-21 07:15:00 / Yangiliklar
Yurtimiz shiddat bilan rivojlangan davlatlar sirasidan joy olmoqda. Respublikamizdagi barcha sohalarda xususan, ichki ishlar organlarida amalga oshirib kelinayotgan islohotlar bu odimlarga yanada joʻshqinlik bagʻishlamoqda.
Jumladan, jinoyatchilikka qarshi kurash, huquqbuzarliklarga yoʻl qoʻymaslik borasida ularni barvaqt aniqlash orqali oldini olish muhim ahamiyat kasb etyapti. Shu bilan birga, ichki ishlar organlari faoliyatiga ilgʻor texnologiyalarni joriy etish, moddiy-texnik bazasini mustahkamlash, shaxsiy tarkibi va ularning oila aʼzolarini ijtimoiy himoya qilishga alohida eʼtibor qaratilmoqda. Bu masalaning bir tomoni boʻlsa, yana bir tomoni xodimlarning oʻz vazifalariga vijdonan va sidqidildan yondashishi, berilgan topshiriqlarni bekami-koʻst bajarishlari, jamoat tartibi va xavfsizligini taʼminlashda ish samaradorligini oshirish boʻyicha zaruriy va yetarli shart-sharoitlarni yaratishga qaratilganidir. Zotan, ish quroling soz boʻlsa, mashaqqating oz boʻlur, degan naql bejizga aytilmagan.
Taʼkidlash joiz, bu borada ham qator eʼtirofga loyiq ijobiy ishlar amalga oshirib kelinmoqda. Kuni kecha poytaxt koʻchalarida jamoat tartibini saqlash, xavfsizlikni taʼminlash qatorida xizmatdagi xodimlarning bevosita xavfsiz xizmatlarini tashkillashtirish maqsadida yangi rusumdagi, talab darajasida jihozlangan 100 ta “Cobalt” avtomashinalari xizmatga safarbar etildi. Bu avtotransportlar poytaxt koʻchalarida jamoat tartibini saqlash, jinoyatchilik va huquqbuzarliklarning oldini olishga katta hissa qoʻshishi tayin. Ichki ishlar organlari xodimlari tomonidan samarali xizmat olib borilishi uchun yaratilayotgan shart-sharoitlar, ajratilayotgan kuch-vositalar har bir xodimning xizmatga boʻlgan munosabatini oʻzgartirib, halol va sidqidildan xizmat olib borishga ruhlantirishi tabiiy.
Toshkent shahar IIBB Patrul-post xizmati brigadasida tashkil etilgan tantanali tadbirda soʻzga chiqqan bosh boshqarma boshligʻi polkovnik Ravshan Sultanxodjayev har bir xodim oʻz xizmat vazifasiga vijdonan yondashishi va sidqidildan xizmat qilishi lozimligini alohida taʼkidladi. Avtomashinalar kalitlari tantanali ravishda topshirilgach, xodimlar xizmatga kirishdilar.
Toshkent shahar IIBB Axborot xizmati